Օրերս ԱՄՆ-ում կայացավ ՀՀ ԱԳ նախարար Էդուարդ Նալբանդյանի և ԱՄՆ պետքարտուղար Ջոն Քերիի հանդիպումը: Կողմերը խոսել էին ոչ միայն երկկողմ հարաբերությունների, այլև ԼՂ հակամարտության խաղաղ կարգավորման գործընթացի և բանակցային ներկայիս փուլի շուրջ: Պետքարտուղար Քերին ընդգծել էր, որ ԱՄՆ-ը, որպես ԵԱՀԿ Մինսկի խմբի համանախագահ, շարունակելու է իր ամբողջական աջակցությունը՝ հակամարտության կողմերի միջև համաձայնության ձեռք բերման և հիմնախնդրի խաղաղ կարգավորման համար: Հենց այդ նպատակով վերջերս ԵԱՀԿ Մինսկի խմբի համանախագահներն ու վերլուծաբաններն անուղղակիորեն խոսում են բարձր մակարդակի հանդիպման, մասնավորապես՝ Հայաստանի և Ադրբեջանի նախագահների հանդիպման անհրաժեշտության մասին:
«Առաջին լրատվական»-ն այս մասին զրուցեց Ադրբեջանի Խաղաղության և ժողովրդավարության ինստիտուտի Հակամարտությունների և միգրացիայի բաժնի ղեկավար, քաղաքագետ, ադրբեջանցի կոնֆլիկտոլոգ Արիֆ Յունուսովի հետ, ով այն կարծիքին է, որ նման հանդիպումն այսօր անիմաստ է:
Նա նշեց, որ նույնիսկ տեսականորեն նախագահների մակարդակով հանդիպումը ԼՂ հակամարտության խաղաղ կարգավորման գործընթացում որևէ դրական տեղաշարժ չի կարող բերել այն ժամանակ, երբ Ադրբեջանում ամիսներ անց նախագահական ընտրություններ են: Նրա գնահատմամբ՝ նախագահներից որևէ մեկը չի կարող հանդգնել ինչ-որ քայլերի գնալ այս պարագայում, երբ խոսքը նման լուրջ հարցերին է վերաբերում, ինչպիսին ղարաբաղյան հակամարտությունն է, ուստի նման քայլի որևէ մեկը չի գնա՝ ոչ այս, ոչ այն կողմը:
«Դա հատկապես այն պարագայում, եթե հաշվի առնենք, որ հակամարտությունը կհանգուցալուծվի միայն կոմպրոմիսի պայմաններում, իսկ դա լի է սեփական ժողովրդի աչքում քաղաքական կապիտալի կորուստներով: Ուստի ապրիորի նմանատիպ հանդիպումները ոչինչ չեն կարող տալ պրագմատիկության տեսանկյունից: Դրանք արդյունավետ չեն: Ըստ իս՝ դրանք կարող են ունենալ միայն պրոպագանդող նշանակություն, երբ անհրաժեշտ է այդ հանդիպումն օգտագործել սեփական իշխանությունն ու ուժը ցուցադրելու համար: Ուստի ես չեմ հավատում, թե նման առանձին հանդիպում կկազմակերպվի մինչ Ադրբեջանում կայանալիք նախագահական ընտրությունները»,- մեկնաբանեց Արիֆ Յունուսովը՝ հավելելով, որ եթե նույնիսկ կայանա նման հանդիպում, ապա այն չի լինի արդյունավետ և որևէ բան չի տա կոնֆլիկտին:
Ադրբեջանցի կոնֆլիկտոլոգն ընդգծեց, որ իր վերաբերմունքը հայ-ադրբեջանական հակամարտության ներկայիս փուլին չի փոխվել, թեև հակամարտության շրջանակում հանդիպումներ են կայանում: Նրա համոզմամբ՝ հակամարտության հանգուցալուծումը պետք է կայանա համակարգային գործոնների ազդեցությամբ և համադրմամբ: «Այսինքն՝ եթե մի կողմը շարժվում է մեկ ուղղությամբ, մյուսը ևս այդ ուղղությամբ պետք է շարժվի: Իդեալական տարբերակը կլիներ այն, որ երկու կողմերն էլ շարժվեին մեկ` ժողովրդավարական ուղղությամբ: Այս դեպքում միայն հնարավորություն կստեղծվեր ղարաբաղյան հակամարտության խաղաղ կարգավորման համար: Բայց քանի դեռ յուրաքանչյուր կողմը շարժվում է իր ուղղությամբ, նշանակում է, որ ղարաբաղյան հակամարտության լուծումը կփոխանցվի ապագա սերունդներին»,- ավարտեց իր խոսքը նա:
