ԱՄՆ-ը անհատական պատժամիջոցների լրացուցիչ փաթեթ է սահմանել Լիբիայի ներկայիս ղեկավարության և երկրում իրավիճակի վատացմանն ու բնական ռեսուրսների գողությանը մասնակից անձանց դեմ: «Ուկրինֆորմի» հաղորդմամբ՝ այս մասին հայտնել է ԱՄՆ Պետդեպի խոսնակ Ջոն Քիրբին:
«Նախագահը նոր կարգադրություն է հրապարակել, որը ԱՄՆ-ին լիազորում է պատժամիջոցներ սահմանել ֆիզիկական և իրավաբանական անձանց դեմ, որոնք սպառնում են Լիբիայի խաղաղությանը, անվտանգությանն ու կայունությանը»,- ասել է նա:
Պատժամիջոցներն ուղղված են այն անձանց դեմ, ովքեր պատասխանատու են համարվում Լիբիայում խաղաղ գործընթացի խախտման համար, մասնակից են խաղաղ քաղաքացիների և ենթակառուցվածքի վրա հարձակումների կազմակերպմանը, ինչպես նաև նավթի անօրինական արդյունահանմանը:
Սահմանափակումները նախատեսում են ֆիզիկական անձանց և ընկերությունների սեփականության կալանք, ինչպես նաև ԱՄՆ մուտքի արգելք:
Այդ որոշման պատճառ է դարձել Լիբիայում բռնության աճը, զենքի մատակարարումների ՄԱԿ-ի էմբարգոյի խախտումը և երկրի բնական ռեսուրսների յուրացումը:
