«Ազատ դեմոկրատներ» կուսակցության պատգամավոր Խաչատուր Քոքոբելյանը ԱԺ ներկայացրեց ԵՏՄ-ին Հայաստանի անդամակցության դադարեցման գործընթաց սկսելու մասին ՀՀ ԱԺ հայտարարության նախագիծը, որտեղ նշված է, որ անդամակցությունից առ այսօր մենք տնտեսական առումով որևէ դինամիկա չենք ունեցել, իսկ վերջին դեպքերն էլ ցույց տվեցին, որ անվտանգության առումով էլ այդ կառույցը մեզ որևէ երաշխիք չի տալիս: Մինչդեռ ԵՏՄ անդամակցության ողջ ընթացքում իշխանությունը նշում էր, որ տնտեսականից զատ՝ կա նաև անվտանգության բաղադրիչ:
Ըստ «Ժառանգություն» խմբակցության պատգամավոր Թևան Պողոսյանի ՝այդ քննարկումը կարևոր արժեք կունենա հասարակության մեջ ընկալելի դարձնելու համար Հայաստանի ԵՏՄ անդամակցության խութերն ու խնդիրները: «Հայաստանը չի կարող ԵՏՄ-ի շրջանակներում բավարարել իր երկարատև շահերը, ԵՏՄ-ում որևէ անվտանգության խնդիր էլ չի կարող լուծվել»,- «Առաջին լրատվական»- ի հետ զրույցում ընդգծեց Թևան Պողոսյանը:
Նրա գնահատմամբ՝ որևէ մեկը չզգաց, թե ԵՏՄ-ն ինչ է. այն չնպաստեց Հայաստանի տնտեսության զարգացմանը, մենք այդպես էլ մնացինք որպես ներկրող շուկա, և եթե առաջ ներկրվում էր եվրոպական կամ այլ շուկաներից, հիմա ապրանքների մեծ մասը ներկրվում է Ռուսաստանից: «Ես չեմ հավատում այդ կառույցի ճակատագրին, եթե անգամ Հայաստանն էլ մնա այդ կառույցում»,- նշեց պատգամավորը:
Թևան Պողոսյանի դիտարկմամբ՝ եթե այսօրվա համահայկական միասնական կոնսոլիդացիայի դրական էներգիան օգտագործենք ամենօրյա աշխատանքում և չուշացնենք խնդիրների քննարկումը, կհասնենք համակարգային փոփոխության:
Մանրամասները՝ տեսանյութում:
