Սան Բեռնարդինոյի հրաձիգի iPhone-ը կոտրելու համար ՀԴԲ-ն երրորդ անձանցից ձեռք է բերել «հատուկ սարք»: Այս մասին հայտնում է The Verge-ը՝ հղում անելով ՀԴԲ տնօրեն Ջեյմս Քոմիի հայտարարությանը:
Նա չի մանրամասնել դիվայսը կոտրելու միջոցները, սակայն նշել է, որ ՀԴԲ-ն չի կարող կոտրել iPhone-ի այն մոդելները, որոնք թողարկվել են iPhone 5c-ից հետո:
«Այն չի գործում iPhone 6s-ի դեպքում, չի գործում iPhone 5s-ի դեպքում: Այսպիսով, մենք սարք ունենք, որը կարող է ապահովել հասանելիություն միայն սմարթֆոնների մոդելների նեղ շերտի»,- հայտարարել է Քոմին:
Նա նաև չի մեկնաբանել Apple-ի հարցումները, որը ցանկանում է իմանալ սարքը կոտրելու մեթոդները: Նրա խոսքով՝ երբ ՀԴԲ-ն բացահայտի այդ տվյալները, Apple-ը կշտկի այդ խոցելիությունը, և բյուրոն կկորցնի առավելությունը:
Սան Բեռնարդինոյի հրաձիգ Սաիդ Ֆարուքը և նրա կինը՝ Թաշֆին Մալիքը, դեկտեմբերի 3-ին սպանել են 14 անզեն մարդու և վիրավորել ավելի քան 20-ին: Նրանք փորձել են փախչել, բայց ոչնչացվել են իրենց հետապնդող ոստիկանության հետ փոխհրաձգության ժամանակ:
