ԱԺ Հանրապետական խմբակցության ղեկավար Վահրամ Բաղդասարյանը երեկ հայտարարել է, թե այնքան էլ ճիշտ չէ լրիվ քաղաքականացված խորհրդարան ունենալը, և այնտեղ պետք չեն միայն ճառեր ասող մարդիկ, քանի որ, եթե հարցնենք ժողովրդին, ապա կտեսնենք, որ խորհրդարանում չխոսող շատերը ժողովրդի համար տեղերում ավելի շատ գործ են անում, քան ճարտասանները: Հանրապետական խմբակցության ղեկավարից այլ բան լսելը և խորհրդարանի մասին այլ պատկերացումներ սպասելը անկասկած անիմաստ կլիներ:
Բանն այն է, որ եթե խորհրդարանը Հայաստանում լինի իսկապես քաղաքական օրգան, ապա Հանրապետական կուսակցության գրեթե ամբողջ խմբակցությունը, այդ թվում և՝ խմբակցության ղեկավարը պետք է հրաժեշտ տային այդ օրգանին: Սակայն Վահրամ Բաղդասարյանի հայտարարությունն, իհարկե, ունի այլ ենթատեքստ և այլ հասցեատեր:
Բանն այն է, որ Հայաստանում տեղի ունեցող ներիշխանական ակտիվ խմորումները առաջ են բերել մի շարք խնդիրներ, որոնք սրվում են հատկապես այն պատճառով, որ ոչ ոք չգիտի, թե ինչ ծրագրեր ունի Սերժ Սարգսյանը և ով ինչ տեղ ունի այդ ծրագրերում: Իսկ Սերժ Սարգսյանը անում է հակասական քայլեր՝ թույլ չտալով, որ իշխանության թևերը կարողանան որևէ հստակ կողմնորոշում ունենալ առկա զարգացումների մասով:
Սարգսյանի մի քանի նոր նշանակումներ վկայեցին, որ շատ մեծ հավանականությամբ էական թարմացումները կարող են կրել շղթայական բնույթ և առնչվել նաև խորհրդարանական ցուցակներին: Եվ սա, բնականաբար, անհանգստացնում է խորհրդարանի Հանրապետական խմբակցության մեծամասնությանը, որը կարող է դառնալ Սերժ Սարգսյանի նախընտրական քարոզչության զոհը:
Այդ իրողությունը իսկապես մեծ տագնապների տեղիք է տալիս ՀՀԿ ներսում, և Վահրամ Բաղդասարյանն արտահայտում է այդ շերտի տագնապներն ու Սերժ Սարգսյանին է հիշեցնում, որ այդ շերտը ավելի շատ բան է անում իշխանության համար, քան ՀՀԿ-ական երիտասարդ հռետորները: Վահրամ Բաղդասարյանն այդ շերտի անունից, ըստ էության, նաև որոշակիորեն ակնարկում է Սերժ Սարգսյանին, որ իշխանության մեջ հենց իրենք են առավելագույնս լեգիտիմ և այդ նպատակն է հետապնդում նրա հայտարարությունը, թե գնացեք ու հարցրեք ժողովրդին:
Սերժ Սարգսյանն, իհարկե, դա լավ գիտի, սակայն հենց սա էլ, ըստ էության, գլխավոր մոտիվն է, որը նրան ստիպում է առաջին իսկ հնարավորության դեպքում ազատվել այդ շերտի ներկայացուցիչներից՝ թույլ չտալով, որ իշխանական օղակներում լինի վատ, թե լավ, սակայն լեգիտիմությամբ իրեն գերազանցող որևէ մեկը:
