ՌԴ-ն հետագայում ևս Սիրիային աջակցություն կցուցաբերի, այդ թվում՝ ռազմական, ներառյալ հետախուզությունը. ռուսական ռազմական ուժերն այդ երկրում բավարար են՝ առաջադրված խնդիրները կատարելու համար: RIA Novosti-ի հաղորդմամբ՝ այս մասին հայտարարել է Ռուսաստանի նախագահ Վլադիմիր Պուտինը:
«Իհարկե, հետագայում ևս աջակցություն կցուցաբերենք Սիրիայում օրինական կառավարությանը, այն համալիր բնույթ ունի: Դա ֆինանսական օգնություն է, տեխնիկայի և սպառազինության մատակարարում, աջակցություն սիրիական զինված ուժերի վերապատրաստման, կազմակերպման և բրիգադային աշխատանքի գործում: Դա հետախուզական աջակցություն է, շտաբային օգնություն գործողությունների ծրագրման գործում, և վերջապես՝ դա անմիջական ուղիղ աջակցություն է՝ հարվածային և կործանիչ օդուժի տիեզերական խմբավորման կիրառում»,- ասել է Պուտինը:
«Այն ռուսական ուժերը, որոնք մնում են Սիրիայում, բավարար են առաջադրված խնդիրները կատարելու համար: Մենք կշարունակենք աջակցություն ցուցաբերել սիրիական բանակին և իշխանություններին, այսպես կոչված՝ ԴԱԻՇ-ի և «Ջեբհաթ ան-Նուսրայի» և այլ ահաբեկչական խմբավորումների դեմ նրանց պայքարում, որոնք այդպես է ճանաչել ՄԱԿ ԱԽ-ն»,- հավելել է Պուտինը:
