Հայաստանի հանրապետական կուսակցության երիտասարդական կազմակերպությունը և «Կոնրադ Ադենաուեր» հիմնադրամը մարտի 11-12-ը կազմակերպել էին «Քաղաքական մարտահրավերները Հայաստանում. սահմանադրական բարեփոխումներ» խորագրով երկօրյա դասընթացը, որոնց մասնակցել են ՀՀԿ ԵԿ Երևանի խորհրդի շուրջ 20 երիտասարդներ:
Ինչպես տեղեկացրին ՀՀԿ երիտասարդական կազմակերպությունից, ծրագրի մեկնարկային օրվա ընթացքում մասնակիցները ծանոթացել են բանակցային հմտություններին, կոալիցիայի կազմման նրբություններին, խոսվել է սահմանադրական բաիեփոխումների և մարդու իրավունքների մասին:
Դասընթաների եզրափակիչ օրվա ընթացքում անդրադարձ է կատարվել առավելապես ընտրական գործընթացներին:
ԵՊՀ Միջազգային հարաբերությունների ֆակուլտետի Քաղաքական ինստիտուտների և գործընթացների ամբիոնի դասախոս, քաղաքական գիտությունների թեկնածու, դոցենտ Ալեն Ղևոնդյանը երիտասարդներին ներկայացրել է քաղաքականության ռազմավարական պլանավորման վրա սահմանադրական բարեփոխումների ազդեցության կարևորագույն ասպեկտները և խորհրդարանական կառավարության առավելությունները: Հաջորդիվ երիտասարդներն գործնական աշխատանք են արել, որի ընթացքում ստացած գիտելիքների և հմտությունների հիման վրա փորձել են ներկայացված սցենարի և առաջադրված խնդիրների շրջանակում Հայաստանում ընտրական գործընթացների ներքո մշակել քաղաքական մարտավարության հնարավորինս արդյունավետ տարբերակներ:
Ծրագրի վերջին դասախոսությունը վարել է ՀՀ ԱԺ աշխատակազմի ղեկավար-գլխավոր քարտուղար Հրայր Թովմասյանը` ներկայացնելով համամասնական ընտրահամակարգի թերություններն ու առավելությունները տարբեր երկրների օրինակով:
Դասընթացն ավարտվել է արդյունքների ամփոփմամբ, գնահատմամբ և մասնակիցներին հավաստագրերի հանձնմամբ:
