Անցյալ շաբաթ խորհրդարանական ճեպազրույցի ժամանակ ՀՅԴ խմբակցության ղեկավար Արմեն Ռուստամյանը դժվարացավ պատասխանել հարցին՝ դեռ անազատության մեջ գտնվող ակտիվիստ Վարդգես Գասպարին քաղբանտարկյա՞լ է, թե ոչ: Նա հայտարարեց, որ Եվրոպայի խորհրդում ընդունված հինգ չափորոշիչները պետք է որոշեն՝ Հայաստանում քաղբանտարկյալ կա՞, թե ոչ, բայց նշեց․ «90-ականներին ազատազրկված դաշնակցականները քաղբանտարկյալ էին: Այն ժամանակ, երբ մենք բանտերում էինք, Հայաստանը ԵԽ անդամ չէր, դա էր սանձազերծել իշխանություններին՝ ինչ ուզեն անեն: Բա քաղբանտարկյալը ոնց է լինում»։
Արմեն Ռուստամյանը խուսափեց պատասխանել հարցին, թե մարտի մեկից հետո էլ չեն եղե՞լ քաղաքական հայացքների համար հետապնդվողներ և բանտարկվածներ։
«Նորից եմ կրկնում, ով է որոշում, այդ որոշման չափորոշիչը կկիարառվի, կհասնենք չորս-հինգ տարի… միակ երկիրը, որ ցանկ ունի, Ադրբեջանն է, ուրիշ այդպիսի դեպք Եվրոպայում չի եղել»,- ասաց Ռուստամյանը:
ԱԺ պատգամավոր, ՀՀՇ վարչության անդամ Ալեքսանդր Արզումանյանը, ով մի քանի անգամ, այդ թվում և 2008 թվականի մարտի 1-ի իրադարձություններից հետո անցկացրել է բանտում, այդ տարիներին ԵԽԽՎ-ում հայկական պատվիրակության ղեկավար Արմեն Ռուստամյանին հիշեցնում է` ԵԽԽՎ ընդունած բանաձևերը քաղբանտարկյալների վերաբերյալ։
ԱԺ պատգամավոր, նախկին քաղբանտարկյալ Նիկոլ Փաշինյանը Արմեն Ռուստամյանի գնահատականը թողնում է նրա և Դաշնակցության խղճին: Նշում է՝ Արմեն Ռուստամյանի գնահատականով չի որոշվում ո՞վ է քաղբանտարկյալ։
Պատգամավորի խոսքերով՝ սա մի հարց է, որ չի կարելի քաղաքական շահարկումների կիզակետում դնել։
