Ադրբեջանական APA լրատվական գործակալության փոխանցմամբ՝ Ադրբեջանի նախագահ Իլհամ Ալիևը Բաքվում ընթացող «Հարավային գազային միջանցք» նախագծի Խորհրդատվական խորհրդի 2-րդ նիստում հայտարարել է, որ 2015 թվականին դրվել է «Անդրանատոլիական» գազատարի (TANAP) հիմքը:
«Այդ նախագիծը կարևոր դեր է խաղում «Հարավային գազային միջանցքի» նախագծում, որը էներգետիկ անվտանգության նախագիծ է։ Այսօր մենք հասկանում ենք, որ դա նախատեսում է երկրների ազգային անվտանգություն։
Էներգակիրների դիվերսիֆիկացումը յուրաքանչյուր երկրի տնտեսության և արդյունաբերության զարգացման հիմնական գործոնն է։ Էներգետիկ տեսանկյունից բնական պաշարներով հարուստ երկրներն անվտանգ դրության մեջ են, որովհետև կախված չեն արտաքին մատակարարումներից։
Սակայն միևնույն ժամանակ այդ երկրները կարիք ունեն վաճառքի շուկաների։ Արտադրողներին անհրաժեշտ են հեռանկարային շուկաններ, որոնք կարգավորվում են օրենքով։ Կարծում եմ, որ հետագա 2-3 տարիներին մեր պլանների հաջող իրագործումը ցույց կտա, որ «Հարավային գազային միջանցքի» նախագիծը շատ լավ ապագա ունի»,- ասել է նա։
