Իսրայելը հույս ունի խաղաղ համաձայնության հասնել իր բոլոր հարևանների հետ: Այս մասին հայտարարել է երկրի վարչապետ Բենիամին Նեթանյահուն՝ ՌԴ նախագահ Վլադիմիր Պուտինի հետ բանակցություններից հետո:
«Մենք ցանկանում ենք խաղաղ ապրել մեր բոլոր հարևանների հետ: Մեզ հաջողվել է խաղաղ համաձայնության հասնել մեր երկու հարևանների հետ: Աստված տա, նման համաձայնության գանք մեր մյուս հարևանների հետ և, իհարկե, պահպանենք այն, ինչ ունենք»,- ասել է Նեթանյահուն:
Դրա հետ մեկտեղ նա ընդգծել է, որ Իսայելի խնդիրն իր քաղաքացիների պաշտպանությունն է:
Խոսելով Պուտինի հետ բանակցություններից՝ Նեթանյահուն նշել է. «Կողմերը երկար և խորը զրույցներ են վարել մեր տարածաշրջանի վիճակի մասին»:
«Մենք հիանալի հնարավորություն ունենք ավանդաբար զրուցել միմյանց հետ, բացեիբաց արտահայտել մեր դիրքորոշումը և միասին փորձել հասնել ընդհանուր խնդրի լուծմանը»,- հավելել է Իսրայելի վարչապետը:
