«Հանրապետականը ինչպես որոշում՝ այնպես էլ հարցերը կարգավորում է: Իրենք են որոշում՝ ասենք, Մարդու իրավունքների պաշտպանը պե՞տք է գործունեություն ծավալի, թե՞ ոչ: Եթե անձը ցանկալի չէ իրենց համար, կարող են փոխել՝ իրենց ընտրությամբ և դա պարտադրել հանրությանը»,- «Առաջին լրատվական»-ի հետ զրույցում Մարդու իրավունքների պաշտպանի թեկնածության առնչությամբ իր կարծիքը հայտնեց իրավապաշտպան Ժաննա Ալեքսանյանը:
Իրավապաշտպանը Մարդու իրավունքների պաշտպանի ՀՀԿ թեկնածու Արման Թաթոյանի անձի դեմ ոչինչ չունի, նրան չի էլ ճանաչում, սակայն համարում է, որ Օմբուդսմենի պաշտոնը ենթադրում է ոչ թե գիտելիքներ, ինչը վկայակոչում են հանրապետականները, այլ «հեղինակություն, հանրության կողմից ճանաչում: Իսկ Արման Թաթոյանը չունի այդ անունը, և եթե նա նոր պետք է սկսի իրավապաշտպան գործունեությունը, չեմ կարծում, թե նա այդ պաշտոնին հարմար թեկնածու է»:
Ժաննա Ալեքսանյանի համոզմամբ՝ իշխանությունները միանշանակ խոնարհ թեկնածու են փնտրում. «Չեմ պատկերացնում առհասարակ Հանրապետականի հետաքրքրությունը մարդու իրավունքների ոլորտում: Այս կուսակցությունն ընդհանրապես մարդու իրավունքների հետ որևէ աղերս չունի»:
Նրա խոսքով՝ ՀՀԿ-ի անգամ կին պատգամավորները երբևէ չխոսեցին, օրինակ, 24-ամյա երիտասարդ աղջկան՝ Սյուզի Գևորգյանին գետնին գցելու, ծեծի ենթարկելու կամ այլ բռնությունների մասին:
Ժաննա Ալեքսանյանը վստահ է, որ Արման Թաթոյանը երբեք չի հակադրվի Հանրապետական կուսակցությանը, և նա կաշխատի այն պայմանավորվածության շրջանակում, որ ձեռք է բերվել, այսինքն՝ նա կանի այնքան, որքան իրեն թույլ կտան. «Եթե նա շատ առաջ գնա, կարժանանա Կարեն Անդրեասյանի ճակատագրին»:
Անդրադառնալով նախկին Պաշտպան Կարեն Անդրեասյանի հրաժարականի հարցին՝ Ժաննա Ալեքսանյանն ասաց. «Կարեն Անդրեասյանը խախտել է պայմանավորվածությունը: Իսկ եթե նա բացահայտեր և իր հրաժարականի պատճառները ներկայացներ, ես կարծում եմ՝ կպատժվեր»:
Իրավապաշտպանը ափսոսանք է հայտնում, որ հանրապետականները Օմբուդսմենի պաշտոնը ճզմում են՝ նշանակելով չինովնիկների: Իսկ պաշտպանության նախարարի հայտարարությունը, թե 21-ամյա Տիգրան Մազմանյանը քաղաքական գործիչ է, Ժաննա Ալեքսանյանը համարում է անընդունելի՝ «հատկապես, որ այն մարդկային երանգներ չի պարունակում»:
