Երևանի ավանագու ընտրություններում ԲՀԿ ցուցակի երկրորդ համար Գուրգեն Արսենյանը, ով ինքնաբացարկի դիմում է ներկայացնելու, վաղը կմասնակցի Աբովյանում կառուցված Սուրբ Հովհաննես եկեղեցու օծման արարողությանը: Այս մասին «Առաջին լրատվական»-ի հետ զրույցում ասաց ինքը՝ Արսենյանը:
Մեր այն հարցին, թե հարթվե՞լ է ԲՀԿ-ի ներքին խնդիրը, Արսենյանը հրաժարվեց պատասխանել` հայտարարելով, թե ասում է, որ մասնակցելու է օծման արարողությանը և վերջ:
Հիշեցնենք, որ ԲՀԿ խմբակցության քարտուղար Նաիրա Զոհրաբյանն օրերս հարցազրույց էր տվել Zham.am-ին և հարցին, թե «օրաթերթերից մեկը, հղում անելով ԲՀԿ աղբյուրին, տեղեկացնում է, որ մայիսի 5-ից հետո ԲՀԿ-ում շոկ է: Կա՞ նման բան», հայտարարել էր. «Ո՛չ, չկա: Ավելին՝ ինձ համար հասկանալի չէ, թե ԲՀԿ այդ աղբյուրի մոտ, որն, ի դեպ, ԲՀԿ համամասնական ցուցակի առաջին եռյակում է, ինչո՞ւ է շոկ առաջացել»:
Հիշեցնենք, որ ԲՀԿ «աղբյուրը» «Հրապարակին» ասել էր, թե ընտրությունից հետո ԲՀԿ-ում շոկ է. ցուցակները դրվել են Ծառուկյանի առաջ` պարզելու, թե ինչու և ում պատճառով է նման արդյունք գրանցվել: Նաիրա Զոհրաբյանը հայտարարել էր, որ այդ «աղբյուրը» ԲՀԿ ցուցակի առաջին եռյակում է։ Ինչպես հայտնի է, ԲՀԿ ավագանու ցուցակի առաջին երեք համարներն են՝ Վարդան Օսկանյանը, Գուրգեն Արսենյանն ու Աբրահամ Մանուկյանը: Որոշ չճշտված տեղեկություններով` Նաիրա Զոհրաբյանի հայտարարությունը վերաբերում էր հենց Գուրգեն Արսենյանին:
