Տարեց ամերիկահայ ամուսինները ազգային ատելություն պարունակող նամակ են ստացել, հայտնում է Ամերիկայի հայ դատի հանձնախումբը:
«Ազատություն» ռադիոկայանի փոխանցմամբ՝ մայիսի 8-ին տարածած հայտարարության մեջ Հայ դատի հանձնախումբը կոչ է անում ոստիկանությանն ու փոստային ծառայության ղեկավարությանը լիարժեք հետաքննել և պատասխանատվության ենթարկել տարեց հայ ամուսիններին հակահայկական բովանդակությամբ սպառնալիքներ ուղարկողներին:
Նամակը, որ հասցեագրված է եղել Արա Սահակյանին, պարունակել է Բոստոնյան մարաթոնի ահաբեկչության վերաբերյալ մի տպագիր հոդված, դրանում ընդգծված են եղել այն տողերը, որոնցում հոդվածի հեղինակը, իհարկե, սխալ կերպով, ահաբեկչությունը կապել է իբրև թե հայազգի Միշայի հետ: Այդ ընդգծված տողերի կողքին ձեռագրով գրված են եղել Another Armenian Bastard («Եվս մի հայ սիրիկա») բառերը:
Ամերիկայի հայ դատի հանձնախումբը հայտարարության մեջ կոչ է անում դաշնային և տեղական իշխանություններին անհապաղ հետաքննել և դատական հետապնդման ենթարկել այն անձանց, ովքեր պատասխանատու են ազգային ատելության հողի վրա կատարված այս հանցագործության համար:
«Անհանդուրժողականության, սպառնալիքի և ատելության այս քայլը պիտի որ հիշեցնի լրատվամիջոցներին այն մարդկային գինը, որ անմեղ քաղաքացիները վճարում են «Միշայի» պատմության հետ կապված իրենց վրդովեցուցիչ և կրկնվող սխալի պատճառով», – ասված է Վաշինգտոնի հայ դատի գրասենյակի տարածած հայտարարությունը:
Հայտարարության մեջ այնուհետ ներկայացվում են հայազգի ամուսինները. Արա և Սալբի Սահակյանները Մերիլենդի երկարամյա բնակիչներ են, Բաթեստայի Սուրբ Խաչ հայկական առաքելական եկեղեցու աշխարհիկ ղեկավար խորհրդի կազմում են, ինչպես նաև ակտիվորեն անդամակցում են քաղաքացիական և համայնքային կազմակերպությունների:
Ամերիկյան բանակի վետերան Արա Սահակյանը չորս տասնամյակ ինժեներ է աշխատել Ամերիկյան նավատորմում, նրա կինը` Սալբին, նախ աշխատել է Կոնգրեսի գրադարանում, ապա` Սենատի մեծամասնության ղեկավար Մայք Մենսֆիլդի օգնականն է եղել:
Բոստոնի մարաթոնի ահաբեկչության օրերին, ամերիկահայերի վրդովմունքն ու բողոքի ալիքն էին առաջացրել նորությունների թողարկումները, որոնք կրկնում էին նույն անհիմն և այժմ արդեն ամբողջովին հերքված այն պնդումները, որ արել էր ահաբեկչության երկու կասկածյալ Ցարնաև եղբայրների ազգականը` Ռուսլան Ցարնին: Իր հարցազրույցներից մեկում Ցարնին նշել էր, որ եղբայրների հայացքների ծայրահեղականացմանը նպաստել է ոմն դավանափոխ հայ` Միշա անունով:
Հայ դատի ամերիկյան հանձնախումբը նաև կապ է հաստատել տեղի եկեղեցիների և համայնքային կազմակերպությունների հետ` խնդրելով ուշադիր լինել այլ հակահայկական դրսևորումների կամ ատելության դեպքերի նկատմամբ և հաղորդել դրանց մասին:
Հիշեցնենք` ապրիլի 15-ին Բոստոնի մարաթոնի եզրագծի մոտ տեղի ունեցած երկու պայթյունները խլել են 3 հոգու կյանք, ևս 260 մարդ վիրավորվել են:
Ամերիկյան իրավապահները ահաբեկչությունը իրականացնելու մեջ կասկածում են Ցարնաև եղբայրներին, որոնցից մեկը` Թամերլան Ցարնաևը սպանվել է ոստիկանության հետ փոխհրաձգության հետևանքով, իսկ մյուսը` Ջոխար Ցարնաևը ձերբակալվել է վիրավոր վիճակում: