Միջազգային ահաբեկչությանն անհնար է միայն ռազմական ուղիով հաղթելը, անհրաժեշտ են նաև քաղաքական և տնտեսական միջոցառումներ՝ ասել է Ռուսաստանի արտգործնախարար Սերգեյ Լավրովը 2015 թվականին Ռուսաստանի արտաքին քաղաքական գործունեության արդյունքներին նվիրված մամլո ասուլիսի ժամանակ։ Այս մասին փոխանցում է RIA Novosti-ն։
«Ակնհայտ է, որ միայն ռազմական ճանապարհով ահաբեկչությանը հաղթելն անհնարին է, անհրաժեշտ է համադրել ռազմական գործողությունները հակամարտությունների կարգավորման քաղաքական գործողությունների, տնտեսական ենթակառուցվածքից ահաբեկիչների օգտվելը թույլ չտալու միջոցառումների հետ»,- ասել է Լավրովը՝ մատնացույց անելով ԴԱԻՇ-ի կողմից իրականացվող նավթի և այլ մաքսանենգ ապրանքների առևտուրը։
Նախարարն ընդգծել է անհրաժեշտությունը՝ մտածելու տուժած երկրների տնտեսական վերականգնման մասին, երբ ահաբեկչական սպառնալիքն անցնի։
«Եվ, իհարկե, կարևոր է ծայրահեղական գաղափարախոսությանը դիմակայելը»,- ասել է նա։
Լավրովի խոսքով՝ ռուսական ավիացիայի գործողություններն իսկապես օգնել են կոտրելու իրավիճակն այդ երկրում, օգնել են ապահովել ահաբեկիչների կողմից վերահսկվող տարածքի սեղմումը։
Նախարարը նշել է նաև, որ ռուս զինծառայողների գործողությունների շնորհիվ «էականորեն պարզվել է տեղի ունեցողի պատկերը և ակնհայտ դարձել, թե ով է պայքարում ահաբեկիչների դեմ, իսկ ով ձգտում օգտագործել նրանց իր միակողմանի, եսասիրական նպատակների համար»։
