Մայիսի 7-ին ԱՄՆ ՄԶԳ հայաստանյան առաքելությունը, Երևանի պետական համալսարանը (ԵՊՀ) և ԱՄՆ-ի Արիզոնա նահանգի պետական համալսարանը նշել են ԵՊՀ-ում Գենդերային հետազոտությունների և առաջնորդության կենտրոնի պաշտոնական բացումը: Կենտրոնը կանանց և գենդերային հետազոտությունների ուսումնական նոր պլան կմշակի, կաջակցի համալսարանի կին շրջանավարտների մասնագիտական առաջխաղացմանը, կիրականացնի հանրային իրազեկման միջոցառումներ, ինչպես նաև կնպաստի գենդերային հավասարության և կանանց առաջնորդության հիմնախնդիրներին վերաբերող հետազոտությունների և պետական քաղաքականության առաջխաղացմանը:
Կենտրոնը հիմնադրվել է Կանանց զարգացման ծրագրի շրջանակներում, որը մեկնարկել է 2013 թվականին` ԱՄՆ ՄԶԳ-ի և «Բարձրագույն կրթությունը զարգացման համար» ծրագրի համատեղ ջանքերով: Միացյալ Նահանգների հինգ համալսարաններ են ընտրվել գործակցելու Հայաստանի, Պարագվայի, Ռուանդայի և Հարավային Սուդանի բուհերի հետ` նշված չորս երկրներում բիզնեսի, գյուղատնտեսության և կրթության ոլորտներում կանանց համար կրթական ծրագրերն ու հնարավորությունները խթանելու և զարգացնելու համար:
Արիզոնայի պետական համալսարանի (ԱՊՀ) կողմից իրականացվող Կանանց զարգացման ծրագրի բաղադրիչը կշարունակի ԱՊՀ-ի և ԵՊՀ-ի միջև շուրջ մեկ տասնամյակ առաջ սկսված համագործակցությունը և կֆինանսավորվի ԱՊՀ-ի Հումանիտար գիտությունների կոլեջի Մելիքյան կենտրոնին հատկացված 1,3 մլն ԱՄՆ դոլար դրամաշնորհի միջոցներով: Գալիք երեք տարիների ընթացքում կանանց հիմնախնդիրների հետազոտություններով զբաղվող ԵՊՀ-ի ութ գիտաշխատողներ կմասնակցեն ԱՊՀ-ի Սոցիալական զարգացման ֆակուլտետի կանանց և գենդերային հետազոտությունների ծրագրի դասընթացներին, կմշակեն ուսումնական ծրագիր ու նպատակային հետազոտության առաջարկներ: Հայ գիտաշխատողները նաև ներկա կգտնվեն ԱՊՀ-ի Հանրային կապերի ֆակուլտետի դասընթացներին: Առաջին խումբը Արիզոնա կմեկնի սույն թվականի աշնանը:
ԵՊՀ-ի Գենդերային հետազոտությունների և առաջնորդության կենտրոնը որպես հանգույց կծառայի ԵՊՀ-ի կարիերայի կենտրոնի և այդ ոլորտում աշխատող համալսարանի ֆակուլտետի համար, ինչպես նաև կկազմակերպի ուսանողական միջոցառումներ և հանրային իրազեկման ու կանանց առաջնորդությունը խթանող նախաձեռնություններ:
