Ադրբեջանական Trend լրատվական գործակալության փոխանցմամբ՝ Վրաստանը դիտարկում է ռուսական գազն ադրբեջանական գազով փոխարինելու հնարավորությունը։ Այդ մասին գործակալության հետ զրույցում հայտարարել է Վրաստանի էներգետիկայի փոխնախարար Մարիամ Վալիշվիլին։
Նրա խոսքերով՝ տվյալ հարցը քննարկվում է ադրբեջանական SOCAR-ի ու ռուսական «Գազպրոմի» հետ բանակցություններում։ Վրաստանի հիմնական գազամատակարարն Ադրբեջանն է։ Բացի այդ, Վրաստանը ստանում է Ռուսաստանի կողմից իր տարածքով Հայաստանին մատակարարվող գազի ծավալի 10 տոկոսը։
Վալիշվիլին հայտարարել է, որ Վրաստանը ներկայումս «Գազպրոմի» հետ քննարկում է Հայաստանին մատակարարվող գազի տարանցման համար ստացվող գազի ծավալը գումարի վերածելու հարցը։ Նա ընդգծել է, որ իրենք ցանկանում են դեպի Հայաստան գազի տարանցման համար «Գազպրոմից» ստանալ փող, իսկ նրա մատակարարած 10 տոկոս գազը փոխարինել Ադրբեջանից մատակարարումների մեծացմամբ։ Նա մանրամասնել է, որ այդ փոխարինման հնարավորությունն ընթացիկ շաբաթ քննարկվել է SOCAR-ի հետ բանակցություններում։
