Ամանորի առաջին տասն օրերին Շտապօգնություն զանգերի թիվը Երևան քաղաքում շեշտակիորեն աճել է: «Շտապբուժօգնություն» ՓԲԸ-ի տնօրեն Թագուհի Ստեփանյանը կանչերի թիվը կապում է վերջին օրերին բացառապես H1N1 վիրուսի տարածման լուրերի հետ:
«Ընդամենը 830 կանչով է ավելի այս տարի: Ստացել ենք 9611 կանչ այս տարի: Մենք այսօր բավականին ծանր ռեժիմով ենք աշխատում, անցած տարի 200-ով քիչ կանչ ենք կատարել ու այդ թիվը համարել էինք սարսափելի»,- ասել է նա:
Կանչերի թիվն ավելացել է սուր շնչառական վարակների հետևանքով: Սուր շնչառական վարակներով 1659 դեպք է գրանցվել մեծահասակների և 699 դեպք՝ երեխաների շրջանում, մեծահասակների միայն 10-ն է տեղափոխվել հիվանդանոց, իսկ 699 երեխաներից՝ 104-ը: «Թոքաբորբից մենք ունեցել ենք 209 դեպք, որից 17-ն են տեղափոխվել հիվանդանոց»,- տեղեկացրեց Թագուհի Ստեփանյանը:
Հունվարի 11-14-ը ընկած ժամանակահատվածում Երևանում գրանցվել է 3590 շտապօգնության կանչ, նրանցից սուր շնչառական հիվանդություններ են ունեցել 585-ը, որոնցից 37-ը հոսպիտալացվել են:
