Չնայած մահացությունների թվի ավելացմանը, այսօր առաջին անգամ արձանագրվել է H1N1-ի դեպքերի ոչ միայն կայունացում, այլև նվազում: Մինչև հունվարի 11-ը թոքաբորբով հիվանդների թիվը 412 էր, այսօր այդ թիվը նվազել է՝ հասնելով 396-ի: Հանրապետության գլխավոր վարակաբան Արա Ասոյանը շտապում է տեղեկացնել, որ կարճ ժամանակ անց այսքան կորուստներից հետո իրենց կհաջողվի հաղթահարել H1N1-ը:
Արա Ասոյանի հավաստմամբ՝ ինչպես Երևանի, այնպես էլ մարզերի հիվանդանոցներում խստացված ռեժիմ և հսկողություն է: Այսօր հոսքը հիվանդանոցներ ընդհանուր առմամբ պակասել է, սակայն դեռ 12 հիվանդի կյանքը փրկելու համար բժիշկները շարունակում են պայքարել:
Այս օրերին հիվանդության երկրորդ ալիքի բռնկում կարող է լինել ներհիվանդանոցային վարակի պատճառով, ուստի Արա Ասոյանի խոսքով՝ արդեն կազմվել է աշխատանքային խումբը, որը փորձելու է կանխել հիվանդության երկրորդ ալիքը:
Ստեղծված իրավիճակի պատճառով անցյալ շաբաթ որոշվեց մեկ շաբաթով երկարաձգել դպրոցներում ձմեռային արձակուրդները։ Հանրապետության գլխավոր վարակաբանն ասում է, որ հավանական է արձակուրդը ևս մեկ շաբաթ երկարաձգվի:
Անդրադառնալով H1N1-ից մահվան դեպքերին՝ Արա Ասոյանը նշեց, որ դրանք հիմնականում եղել են ուղեկցվող խրոնիկական հիվանդությունների պատճառով: Մահացածներից ամենաերիտասարդը եղել է 23 տարեկան:
Գլխավոր վարակաբանը կրկին հորդորում է հատկապես այս օրերին կայուն բարձր ջերմություն ունենալու դեպքում անպայման դիմել բժշկի, վարակը չհամարել հերթական շարքային գրիպ և անտեսել, քանի որ հետագա բարդացումները կարող դառնալ ճակատագրական:
