Հնդկաստանի Թամիլ Նադու նահանգի իշխանությունները հայտնում են 20 դելֆինի սատկելու մասին, որոնք լույս երեքշաբթի գիշերը նետվել են նահանգի լողափերից մեկը: Ծովից դուրս է նետվել ընդհանուր 100 դելֆին, բայց նրանցից 80-ին դեռ կարելի է փրկել, հայտնում է korrespondent.net-ը:
«Դրանք կարճալողակ կետազգիներ են և հավանաբար ապակողմնորոշվել են: Նախկինում նրանք այդպիսի քանակությամբ ափ չեն նետվել»,- ԶԼՄ-ներին տված հարցազրույցում պատմել է տեղացի պաշտոնյա Ռավի Կումարը:
«Մենք դիմել ենք Մաննարի ծոցի ծովային պարկի ղեկավարությանը, նաև անտառային տնտեսության դեպարտամենտին, որպեսզի նրանք հետաքննություն անցկացնեն»,- ասել է նահանգի իշխանությունների ներկայացուցիչը:
Պարբերաբար դելֆիններ ու կետեր են ափ նետվում: Ներկայումս գիտնականները չգիտեն դրա պատճառը, մի քանի վարկած է շրջանառվում:
Դրանցից մեկի համաձայն՝ դեռևս ջրում սատկած առանձնյակների մարմինները հոսանքն է դուրս նետում: Եթե հոսանքը մի խումբ է ափ նետում, բացատրություններից մեկն ընդունված է համարել իրար օգնության կանչելու կետերի ունակությունը. մեկ դուրս նետված կետը կարող է իր հետևից տանել ամբողջ ընտանիքին:
Իսկ ամերիկացի երկրաբան Ջիմ Բերքլանդը, օրինակ, ենթադրում է, որ կենդանիների վրա ազդում են երկրի մագնիսական դաշտի՝ երկրաշարժերով պայմանավորված ամենափոքր փոփոխությունները, որոնք ապակողմնորոշում են նրանց էխոլոկացիայի ներքին համակարգը:
