ԱՄՆ նախագահ Բարաք Օբաման նախագահի պաշտոնում ազգին դիմելու իր վերջին ամենամյա ուղերձին հրավիրել է սիրիացի փախստական Ռիֆաի Համոյին: Այդ մասին հայտնում է USA Today-ը:
55-ամյա սիրիացին, որը 2015 թվականի դեկտեմբերից ապրում է Դեթրոյթում, ելույթի ժամանակ կնստի առաջին տիկին Միշել Օբամայի օթյակում: Ինչպես համարում է պարբերականը, Օբաման այդ քայլով իր անհամաձայնությունն է հայտնում Կոնգրեսում հանրապետական մեծամասնությանը, ովքեր մտադիր են դանդաղեցնել կամ դադարեցնել փախստականների մուտքը երկիր:
Համոն հայտնի է դարձել դեկտեմբերին, երբ նրա մասին գրել է Humans of New York հանրահայտ բլոգը: Սիրիացի գիտնականը փախել է հայրենի երկրից 2013 թվականին` այն բանից հետո, երբ ռումբը քանդել է նրա տունը՝ սպանելով կնոջը, աղջկան և հինգ այլ ազգականների: Արդեն Թուրքիայում Համոյին ախտորոշել են ստամոքսի քաղցկեղ: Երկու տարի սպասելուց հետո ԱՄՆ-ում նա ստացել է փախստականի կարգավիճակ և բնակեցվել Դեթրոյթում:
Իմանալով Համոյի ճակատագրի մասին՝ Օբաման նրա տոկունությունը համարել է ոգեշնչող, իսկ դերասան Էդվարդ Նորթոնը նրա համար կազմակերպել է դրամահավաք, որի շնորհիվ հաջողվել է հավաքել մոտ 400 հազար դոլար:
