Հայաստանի «Էրեբունի» ավիացիոն ռազմակայանը 2016-ի երկրորդ կեսին կհամալրվի բազմաթիրախային ճակատային ՄիԳ-29 կործանիչների նոր խմբաքանակով: Ինքնաթիռները ռազմակայան են ուղարկվում կապիտալ վերանորոգումից հետո: Նպատակն է պաշտպանել Հայաստանի սահմանները ԱՊՀ երկրների ՀՕՊ միավորված համակարգերի շրջանակում:
2016-ի երկրորդ կեսին «Էրեբունի» ավիացիոն ռազմակայանը կստանա նաև 4-րդ սերնդի Մի-8 մեկ տրանսպորտային ուղղաթիռ:
Արդեն Ամանորից հետո ինժեներատեխնիկական կազմը կսկսի պատրաստել հատուկ հագեցվածության կայանատեղիներ նոր ավիացիոն տեխնիկայի համար:
Ռուսաստանի կողմից կործանիչների նոր խմբաքանակով ՀՀ ԶՈՒ-ին զինելը, ըստ քաղաքագետ Լևոն Շիրինյանի, միանշանակ կապված է ռուս-թուրքական լարված հարաբերությունների հետ, որտեղ Հայաստանի տարածքն ուղղակիորեն օգտագործվում է հօգուտ Ռուսաստանի շահերի:
Քաղաքագետի դիտարկմամբ՝ Հայաստանի ներգրավումը ռուս-թուրքական լարված հարաբերություններին չի կարող բացասաբար անդրադառնալ Հայաստանի վրա, քանի որ Հայաստանի տարածքը միշտ էլ օգտագործվել է Մերձավոր և Միջին Արևելքում Ռուսաստանի շահերի պաշտպանության համար:
Հայաստանը՝ որպես ինքնիշխան պետություն, պետք է կարողանա օգտագործել այս հանգամանքը սեփական անվտանգությունն ապահովելու համար:
Քաղաքագետ Ստեփան Գրիգորյանի դիտարկմամբ՝ ռազմական այս համալրումը առաջին հերթին կապված է ռուս-թուրքական լարված հարաբերությունների հետ:
Քաղաքագետի կարծիքով՝ Ռուսաստանն ու Թուրքիան վաղ թե ուշ կհարթեն իրենց հարաբերությունները, և այդտեղ հնարավոր է, որ Հայաստանը միայնակ մնա Թուրքիայի հետ էլ ավելի վատթարացված հարաբերություններով ու Ղարաբաղյան խնդրով:
