Georgia Online-ի փոխանցմամբ՝ Ռուսաստանի իշխանությունները ՆԱՏՕ-ի ընդլայնման համար խնդիրներ ստեղծելու նպատակ են հետապնդում։ Այս մասին հայտարարել է Վրաստանի պաշտպանության նախարար Թինա Խիդաշելին՝ մեկնաբանելով Ռուսաստանում ընդունված ռազմական նոր դոկտրինը:
«Այստեղ ոչ մի նոր բան չկա։ Հասկանալի է, որ ռուսական պետությունը, իշխանությունները նպատակ են դրել խնդիրներ ստեղծել ՆԱՏՕ-ի ընդլայնման համար, և դա միանգամայն սպասելի է։ Տարօրինակ կլիներ, եթե լիներ այլ կերպ։
Նույն Մակեդոնիայի շուրջ ծավալվող զարգացումները շատ լավ ցուցադրում են նրա վերաբերմունքն ու մտադրությունները։ Սակայն միևնույն ժամանակ ազատ աշխարհը գործում է սեփական կանոններով և, բնականաբար, չի ենթարկվում նման շանտաժի կամ նման վերաբերմունքի։
Ռուսաստանը չի պահպանում իր սկզբունքները ո՛չ ինքնիշխան պետությունների, ո՛չ էլ իր օկուպացրած տարածքների հանդեպ, քանի որ այդպիսին է Ռուսաստանի իշխանությունների դեմքը»,- ասել է Վրաստանի պաշտպանության նախարարը։
