Բելգիական բանակը 2009-2012թթ. քրեական անցյալ ունեցող զենքի առևտրականներին է վաճառել 35 ուղղաթիռ և 2 ինքնաթիռ, որոնց մեծ մասը տեղափոխվել են Աֆրիկա: Նման հետաքննական տվյալներ է ներկայացնում Libre Belgique թերթը:
«Վաճառքն իրականացվել է բելգիական բանակի նյութական բազան թարմացնելու ընթացքում»,- նշում է պարբերականը: Թերթի տվյալներով՝ Բրյուսելում գրանցված ընկերությունը, որի անունը չի հաղորդվում, ընդհանուր առմամբ ձեռք է բերել 23 բազմաֆունկցիոնալ Alouette-2 ուղղաթիռ, 12 հատ Agusta A109 ուղղաթիռ և երկու հատ Airbus A310 ինքնաթիռ: Թերթի տեղեկություններով՝ Բելգիայի հատուկ ծառայություններն այդ կազմակերպությանը կասկածում են փողերի լվացման և զենքի անօրինական առևտրի մեջ:
2010 թվականին վաճառված Agusta ուղղաթիռներից 4-ը վերցվել են Մադագասկարի բանակի սպառազինության կազմ, որտեղ մեկ տարի առաջ տեղի էր ունեցել զինված հեղաշրջում: Փորձագետները կասկածներ ունեն, որ մնացած ուղղաթիռների մեծ մասը ուղարկվել են աֆրիկյան պետություններ:
Բելգիայի ՊՆ-ը հայտարարել է, որ տեղեկություն չունի իր գնորդի քրեական դոսյեի մասին: Զինվորականները վստահեցրել են, որ վաճառքից առաջ ուղղաթիռներից ռազմական սարքավորումներն ապամոնտաժվել են:
