«Նոր Հայաստան» հանրային փրկության ճակատն այսօր Ազատության հրապարակում մամուլի ամենօրյա ասուլիս էր հրավիրել:
ՀՔՄ նախագահ Հմայակ Հովհաննիսյանն առաջին բանախոսն էր նա մասնավորապես ասաց. «Այսօր ես լրատվամիջոցների համար կանդրադառնամ այն մենակաբանություններին, որոնք տրվում են իշխանական լրատվամիջոցների կողմից: Դրանց իմաստը հանգում է այն պնդմանը, որ եթե հանրաքվեն համակարգված կեղծվել է, եթե տեղի է ունեցել ընտրական իրավունքի ոտնահարում, ապա ինչո՞ւ զանգվածաբար ժողովուրդը դուրս չի գալիս փողոց և բողոքում, դա անում են ակտիվ քաղաքացիները՝ ստանալով պատուհաններից և պատշգամբներից երթի ընթացքում ջերմ աջակցության դրևսորումներ, բացականչություններ, սակայն ամբողջ ժողովրդով ընդվզում չկա:
Ես ասեմ այն մթնոլորտի մասին, որ ստեղծվել է երկրում վերջին տարիներին, դա բնորոշ է ահաբեկչապետական համակարգին, ժողովրդին վախեցնելու մթնոլորտ, որը դրսևորվեց 2012 թվականի ընտրություններից հետո, այն ժամանակ ստեղծված միասնական շտաբի դեմ և անձամբ իմ դեմ բիրտ ճնշումներով: Համար երկրորդ ուժի առաջնորդը՝ Գագիկ Ծառուկյանը, հրաժարվեց մասնակցել նախագահական ընտրություններին, և իր ղեկավարած կուսակցությունը որևէ դիրքորոշում չհայտնեց: Նույնն արեց ՀՅԴ-ն այն դեպքում, երբ մասնակցել էր բոլոր համապետական ընտրություններին: Նույնիսկ լինելով կասեցված՝ 1996 թվականներին ակտիվորեն պաշտպանեց այն ժամանակ ընդդիմության թեկնածու Վազգեն Մանուկյանին: ՀԱԿ-ը ևս չմասնակցեց նախագահական ընտրություններին»:
Անդրադառնալով կալանավորված զինված խմբավորման անդամներին, որոնք ըստ ԱԱԾ-ի տեղեկատվության պետք է ահաբեկչական գործողություններ իրականացնեին, Հմայակ Հովհաննիսյանը շեշտեց. «Դա իհարկե պարզ է, որ արվեց հենց ընտրարշավի ժամանակաշրջանում, որպեսզի ահաբեկեն մեր ժողովրդին, քաղաքացիներին և նրանց հեռու պահեն ակտիվ քաղաքական դիրքորոշում արտահայտելուց, հեռու պահեն ցույցներին մասնակցելուց: Մեր երթերի ընթացքում ամենուրեք ոստիկանները կանգնում էին երթի երկայնքով և հեռախոսներից կամ կամերաներից նկարահանում էին ցույցի մասնակցիներին»:
Քաղաքագետը մեջբերեց Արիստոտելի այն խոսքերը, թե յուրաքնաչյուրը, ով հետևողական է, ով պահանջատեր է, ով օժտված է ակտիվ քաղաքացիական գիտակցությամբ, 10 հազար հոգու արժեք ունի:
Մանրամասները՝ տեսանյութում:
