«Միջին դասն» այլևս չի կազմում ԱՄՆ բնակչության մեծամասնությունը: Այդպիսի եզրակացության են հանգել Վաշինգտոնի Փյու սոցիոլոգիական կենտրոնի մասնագետները հերթական հետազոտության արդյունքում, հայտնում է TASS-ը:
Նրանց գնահատականով՝ մինչև այս տարվա սկիզբ «միջին դասի» եկամուտ ունեցող չափահաս քաղաքացիների թիվը ԱՄՆ-ում կրճատվել է մինչև 120,8 միլիոն մարդու: Աղքատ և հարուստ ամերիկացիների ընդհանուր թիվը այժմ դարձել է ավելի շատ` 121,3 միլիոն մարդ:
Հեղինակները ստացված արդյունքները անվանում են «դեմոգրաֆիական տեղաշարժ, որը կարող է դառնալ շրջադարձային կետ» ԱՄՆ-ի սոցիալ-տնտեսական զարգացման համար: Տնտեսապես միջին դասը միշտ համարվել է ամերիկյան հասարակության ողնաշարը, իսկ գաղափարապես` կրողը և մարմնավորումը այն արժեքների, որոնց վրա հիմնված է բնակչությունը և երկրի քաղաքական ղեկավարությունը:
