Հյուսիսային Կորեայի առաջնորդ Կիմ Չեն Ինը աղջիկների «Մորանբոնգ» փոփ խմբին ուղարկում է Պեկին՝ մեկշաբաթյա հյուրախաղերի: Այս մասին հայտնում է Gazeta.ru-ն: Այդ կերպ Փխենյանը հույս ունի բարելավել իր հարաբերությունները գլխավոր դաշնակցի հետ ՄԱԿ-ի Անվտանգության խորհրդի նիստի նախօրեին, որտեղ պետք է քննարկվեն Հյուսիսային Կորեայում մարդու իրավունքների խախտումները:
Ակտիվիստները հույս ունեն, որ ՄԱԿ-ը Կիմ Չեն Ինին կհանձնի միջազգային դատարանին, իսկ Անվտանգության խորհրդի անդամ Չինաստանը դա կանխելու գործում Կիմ Չեն Ինի միակ հույսն է:
2012 թվականին նրա կողմից ստեղծված «Մորանբոնգ» խմբում կա 21 աղջիկ: Համարվում է, որ խումբը ստեղծվել է որպես երկրի նոր՝ ավելի բաց և ժամանակակից ընթացքի խորհրդանիշ: Ի տարբերություն Հյուսիսային Կորեայի շատ խմբերի՝ «Մորանբոնգի» անդամները իրենք են նվագում: Բացի այդ, նրանք ունեն զինվորական կոչումներ և հասարակության առջև հիմնականում հայտնվում են համազգեստով: Այնպես որ՝ դա ավելի շուտ ռազմական նվագախումբ է, քան փոփ խումբ:
