Իրանական Mehr լրատվական գործակալության փոխանցմամբ՝ Ադրբեջանի բոլոր մզկիթներում տեղակայվելու են տեսախցիկներ և խստացվելու են անվտանգության միջոցառումները։ Այս մասին հայտարարել է Կրոնական կառույցների հետ աշխատանքային հարցերով պետական հանձնաժողովի նախագահ Մուբարիզ Քուրբանլին։
Նրա խոսքով՝ Լենքորանի և այլ շրջաններում արմատականների խմբերը ճնշում են գործադրել մզկիթի ներկայացուցիչների վրա, որոնք էլ թուլակամություն ցուցաբերելով՝ ամբիոնը տրամադրել են նրանց:
«Մենք ունենք մզկիթների ցուցակը, որոնցում կատարվել է նման բան։ Անկախ նրանից, թե ով է, որքան են, անգամ եթե ձեր դեմ 50 մարդ է, որևէ մեկին մի՛ տրամադրեք ամբիոնն ու բարձրախոսը։ Մզկիթը սուրբ վայր է, ամբիոնը չի կարելի վստահել որևէ մեկի»,- ասել է նա և խորհուրդ տվել նման դեպքերում դիմել ոստիկանությանը։
