Միջազգային դիտորդները, ի տարբերություն ԱՊՀ դիտորդների, այսօր ամփոփելով հանրաքվեի արդյունքները արձանագրեցին, որ դրանք չեն արտացոլում հանրության ազատ կամքը և լեգիտիմ համարվել չեն կարող։
«Արձանագրել ենք լրագրողների նկատմամբ ֆիզիկական բռնություններ, որոշ առիթներով էլ տեղամասային հանձնաժողովի նախագահը հրաժարվում էր այդ առիթով որևէ բան անել: Ուստի գտնում ենք, որ ընտրախախտումներով և հանցագործությունների մեծ թվով, ընտրողների ահաբեկումները, լցոնումներով պայմանավորված այս հանրաքվեի արդյունքները չեն արտացոլում հասարակության ազատ կամքը և չպետք է համարվեն լեգիտիմ: Հիասթափված ենք նաև նախահանրաքվեական քարոզչությունից, ինչպես նաև այն ընթացքից, ինչպես անցկացվեց հենց հանրաքվեն»,- արձանագրեց Նորվեգական հելսինկյան կոմիտեի, EPDE-ի ներկայացուցիչ, Նորվեգիայից ժամանած Լենե Վեթելանդը
EPDE-ի փորձագետ, Ընտրական իրավունքի պաշտպանության «Գոլոս» ընկերակցության ներկայացուցիչ Ռուսաստանից ժամանած Ռոման Ուդոտը պատմեց, որ տեղամասերում անձամբ է արձանագրել լցոնումների դեպքեր և դրանք փաստող լուսանկարները տեղադրել համացանցում։
Հանրաքվեի օրը Վանաձորում դիտորդական առաքելություն իրականացրած Հելսինկյան ասամբլեայի Վանաձորի գրասենյակի ղեկավար Արթուր Սաքունցն էլ փաստեց, որ դեկտեմբերի 6-ին Հայաստանում տեղի է ունեցել համակարգված ահաբեկչություն ընտրողների նկատմամբ և որ հարաքվեի պաշտոնական արդյուքնները աղերս չունեն իրականության հետ։
