Հայաստանի ֆուտբոլի ֆեդերացիայում այսօր տեղի ունեցավ հանդիպում ՀՖՖ նախագահ Ռուբեն Հայրապետյանի ու լրատվամիջոցների ներկայացուցիչների միջև։
«Ալբանիայի խաղին աշխարհի լավագույն մարզչին էլ բերեիր, էդ խաղը տենց էր լինելու։ Հասկանում եք չէ՞՝ ինչ ի նկատի ունեմ, ուղղակի հիմքեր չունեմ, փաստ չունեմ։ Բայց ես գիտեմ՝ դա այդպես է։ Տեղի է ունեցել դավաճանություն։ Բառիս բուն իմաստով դավաճանություն, բայց ես փաստ չունեմ։ Հիմա այդ խաղին ուզում եք աշխարհի լավագույն մարզիչը լիներ, նույն պատկերն էր լինելու։ Հայաստանի ֆուտբոլի ֆեդերացիայի ննախագահ դառնալուց հետո հայկական ֆուտբոլում իմ ամենամեծ ներդրումը համարում եմ այն, որ կարողացել եմ վերացնել դավաճանությունը։ ՈՒ նորից իմ ժամանակ դա հետ եկավ։ Ես դա համարում եմ ձախողում ինձ համար ու դժբախտություն բոլորիս համար։
Եթե չկարողանամ այդ հարցերը կարգավորել, այո, կհայտարարեմ, որ ի վիճակի չեմ, ի զորու չեմ։ Որոհվետև սա արդեն իմ ուժերից վեր է, ես չկարողացա։ Բայց ոչ մի մարզչի առաջ չես կարող խնդիր դնել։ Առայժմ անուններ չեմ տա, քանի որ չունեմ փաստեր, բայց կունենամ այդ փաստերը։ Ես այն մարդը չեմ, որ հանձնվեմ։ Ինձ չի հետաքրքրում՝ ինչ է անում ՖԱՖ-ը։ Ազնվորեմ են ասում։ Ամեն օր թող գան ստեղ միտինգ անեն, ինձ համար առաջնային խնդիրն է ճշտել՝ ովքեր են և ինչ ձևերով են արել խաղը, ինձ համար Ալբանիայի խաղն է առաջնային:
Մինչև դա չհանեմ ջրի երես, չեմ հանգստանալու։ Հավաքականում 23 ֆուտբոլիստ կա, բոլորին չի կարելի կասկածել։ Ով ուզում է լինի մարզիչը․ 1 ֆուտբոլիստ որոշեց անել, կարող է անել։ 1 ֆուտբոլիստը կարող է խաղը գլխիվայր շրջել։ Ելքն այդ մարդկանց բացահայտելն է։ եթե արել են, պետք է բացահայտվեն։ Դա պետք է դաս լինի մյուսների համար, որ իմանան՝ չի կարելի ծախել երկիրը։ Չէ՞ որ ամբողջ եվրոպական մամուլը գրեց դրա մասին։ Դա մենք մեր վրայից չենք մաքրել, մարզչի մասին ենք խոսում։ Կամ պետք է ապացուցենք, որ նման բան չի եղել, որը ես ծիծաղելի եմ համարում, կամ պիտի ապացուցենք, որ եղել է։
Եթե ֆեդերացիան պարզեց, ֆեդերացիայի նկատմամբ ոչ մի պատժամիջոց լինել չի կարող։ Թող մտածեն այդ ֆուտբոլիստները։ Ինչպես եղավ մրցավարների դեպքում։ ՈւԵՖԱ-ից եկավ 4 քննիչ, չկարողացան պարզել, մենք պարզեցինք և ոչ մի պատժամիջոց չստացանք։ Չէ՞ որ ֆեդերացիան ինքը պարզեց։ Հակառակը՝ խրախուսման նամակ ունենք։ Ֆուտբոլիստներին ի՞նչ պարզել, տալու եմ ժողովրդին։ Ես այդ խաղը նայել եմ երևի 50 անգամ, պահեր կա շատ ավելի։ Ֆիքսել եմ ոչ ֆուտբոլային 30 արարք խաղադաշտում։ Խոսքը վրիպելու մասին չէ, այլ միտումի՝ այդ փոխանցումը, այդ շարժումը․․․։ Տեսագրությունը նայեք՝ գոլը, թե գոլից առաջ ինչ է կատարվում, ինչպես է հարձակումը սկսվում, այնքան ակնհայտ է»,- ասել է Հայրապետյանը։
