ԱՄՆ-ում մշակել են սարքի նոր տարբերակ, որը հնարավորություն է տալիս «մահապարտի գոտի» կրող մարդուն ֆիքսել մինչև 100 մ հեռավորությունից: Այս մասին հայտնում է Defense One պարբերականը:
Standoff Suicide Bomber Detection System (SSBDS) կոչվող հաղորդիչների համակարգը մշակել է ԱՄՆ պաշտպանության նախարարության Ինքնաշեն պայթուցիկ նյութերի դեմ պայքարի հարցերով միավորված գործակալությունը և առաջին անգամ փորձարկվել է 2012թ. Աֆղանստանում:
SSBDS-ն բաղկացած է սպեկտրի միջին և երկար ալիքի ինֆրակարմիր մասում ճառագայթման, նաև տերահերցային դիապազոնով ճառագայթման հաղորդիչներից: Համալիրում տեղադրված է նաև տեսանելի լույսի նկատմամբ զգայուն տեսախցիկ:
Երբ SSBDS-ն ուղղված է մարդու վրա, համակարգը 3 տեսակի պատկեր է ցույց տալիս՝ հատիկավոր սև-սպիտակ, վառ նարնջագույն և սովորական պատկեր: Մահապարտի գոտին իրեն մատնում է մուգ բծերով կամ գծերով այնտեղ, որտեղ պետք է լինեն լրիվ սպիտակ կամ նարնջագույն գոտիներ:
Համալիրի հաղորդիչների յուրաքանչյուր խումբ ունի մինչև 1 մ բարձրություն, ինչը ներկայումս անհնար է դարձնում սարքի շարժական տարբերակի ստեղծումը: Սակայն առաջարկում են SSBDS տեղադրել օդանավակայաններում, մարզադաշտերում, համերգասրահներում և այլ հանրային շենքերում:
