Թուրքական Dünya Bülteni լրատվական կենտրոնի փոխանցմամբ՝ Ռուսաստանի արտգործնախարար Սերգեյ Լավրովը նոյեմբերի 26-ին մեկնելու է Թուրքիա։ Հաղորդվում է, որ այցը կապված է Սիրիայի խնդրի հետ։ Այլ մանրամասներ չեն հաղորդվում։
Հիշեցնենք, որ Անթալիայում G20-ի գագաթնաժողովի շրջանակներում Թուրքիայի նախագահ Ռեջեփ Էրդողանի հետ հանդիպումից հետո Ռուսաստանի նախագահ Վլադիմիր Պուտինը հայտարարեց, որ Թուրքիայի նախագահն իրեն հայտնել է, թե Սիրիայի հարցը կարող է կարգավորվել միայն քաղաքական ճանապարհով։
Չնայած դրան՝ Թուրքիայի արտգործնախարար Ֆերիդուն Սինիրլիօղլուն հայտարարեց, որ Սիրիայի նախագահ Բաշար Ասադը չպետք է մասնակցի երկրի առաջիկա նախագահական ընտրություններին։ Սինիրլիօղլուն նաև հաստատել էր ԱՄՆ պետքարտուղար Ջոն Քերիի այն խոսքերը, որ ԱՄՆ-ն ու Թուրքիան պատրաստվում են վերահսկողության տակ առնել Սիրիայի ողջ հյուսիսային սահմանը, որի 98 կիլոմետրանոց հատվածը մինչ այժմ վերահսկում է ԴԱԻՇ-ը։
