Ֆրանսիական «Յառաջի» փոխանցմամբ՝ Սիրիայի հյուսիսում՝ Հասաքեի նահանգում, քրդական «Ժողովրդավարական Միություն» կուսակցության (PYD) կողմից ինքնավար հռչակված Ջիզրե գավառի իշխանությունների և շրջանի ասորի ու հայ բնակչության միջև լուրջ տարակարծություններ են ծագել: Ասորական և հայկական հաստատությունները համատեղ հայտարարությամբ պախարակել են գավառի իշխանություններին, որոնք խախտում են իրենց իրավունքները:
Ասորական և հայկական 16 հաստատություններ բողոքում են մի շարք կարգադրությունների դեմ՝ հայտնելով, թե չեն ենթարկվելու և նրանց թույլ չեն տալու, որ շրջանի քրիստոնեապատկան ինչքերը օգտագործվեն այլոց կողմից ևս:
Բողոքի հայտարարության մեջ առաջ են քաշված հետևյալ չորս հարցերը.
– Մասնավոր և պետական դպրոցների համար կրթական նոր ծրագիր
– Երիտասարդների պարտադիր զորակոչ
– Հատուկ տուրքի կիրարկման ծրագիր
– Ասորիներին և հայերին պատկանող ինչքերի գրավում
Գավառի իշխանությունները օրենք են ընդունել «Արտագաղթածների ինչքերի մասին», ըստ որի՝ պիտի գրավվենն բոլոր այն կարողությունները, որոնք պատկանում են մարտերի պատճառով շրջանից փախուստի դիմած անձանց, որոնց մեծամասնությունը քրիստոնյաներ են:
Հայտարարության հեղինակների խոսքով՝ այս օրենքը հակասում է Մարդու իրավունքների համաշխարհային հռչակագրին: Նրանք նշում են, որ ճիշտ չէ որպես «դավաճան» դիտարկել նրանց, ովքեր հարկադրված են գաղթել՝ դատապարտելով «կարոտյալներին օգնելու» պատրվակով նրանց ինչքերը գրավելու այս փորձը: Նրանք նկատել են, որ շրջանի ինչքերի 35%-ը պատկանում է քրիստոնյաներին, և իշխանությունները իրենց այս քայլով միտում ունեն փոփոխության ենթարկել շրջանի ժողովրդագրական համայնապատկերը:
Համատեղ հայտարարության հեղինակների խոսքով՝ իրենք այս նոր արտոնություններին և ապօրինի տուրքերին պիտի չանսան և իրենց համար միշտ ի զորու կմնան Սիրիա պետության կողմից հաստատված արտոնություններն ու տուրքերը:
Հայտարարությունը ստորագրել են 16 հաստատություններ՝ շրջանի հայկական, քաղդեական և ասորական եկեղեցիները, Ասորական ժողովրդավարական կազմակերպությունը, Սիրիայի քրիստոնյա երիտասարդության կենտրոնը և այլն…:
