The Daily Mail-ի փոխանցմամբ՝ պարզվում է, որ ղեկավար պաշտոն ստանալը ազդում է ոչ միայն կանանց սոցիալական կարգավիճակի ու եկամուտների, այլև՝ տեստոստերոնի մակարդակի վրա։ Դա պարզել են Վիսքոնսինի համալսարանի գիտնականները։ Այսինքն՝ տվյալ հորմոնի մակարդակը կախված չէ միայն կենսաբանական գործոններից։
Գիտնականները տեստոստերոնի մակարդակը չափել են տղամարդ և կին դերասանների մոտ, որոնք բեմում խաղացել են ղեկավարի դեր և պաշտոնանկ են արել ստորադասներին։ Կամավորներին տրվել է երկու դեր։ Նրանք պետք է իրենց պահեին կամ տղամարդավարի, կամ՝ կանացի։
«Արական» դեր ստանձնած դերասաններին խնդրել են ցույց տալ, որ իրենք վստահ են իրենց որոշումներում և պահանջում են հարգանք։ «Կանացի» դեր ստանձնածները փորձել են տակտ ցուցաբերել և անհարմարություն են զգացել՝ մարդուն աշխատանքից հեռացնելիս։
Հետազոտությունը ցույց է տվել, որ «արական» դերը տեստոստերոնի մակարդակը բարձրացնում է կնոջ, բայց ոչ տղամարդկանց մոտ։ Միևնույն ժամանակ դրա մակարդակը կանանց մոտ բարձրացրել է նաև «կանացի» դեր խաղալիս։ Հետազոտողները ենթադրել են, որ կանանց մոտ հորմոնի մակարդակի վրա ազդել է ղեկավար պաշտոնը և ոչ թե տղամարդկանց բնորոշ պահվածքը։
