«Ժողովրդավարական ուղի» կուսակցության ղեկավար Մանուել Գասպարյանը դժվարանում է անդրադառնալ երեկ ՀՀ գործող նախագահ Սերժ Սարգսյանի և «Ժառանգություն» կուսակցության առաջնորդ Րաֆֆի Հովհաննիսյանի երդմնակալություններին հաջորդած իրադարձություններին Բաղրամյան պողոտայում: «Առաջին լրատվական»-ի հետ զրույցում նա նշեց, որ դժվարանում է վերլուծել նաև, թե ինչու եղավ և ինչպես էր հնարավոր խուսափել տեղի ունեցածից: Սակայն, նրա խոսքերով, ժողովրդական բողոքի ալիքի պատճառները շատ են:
«Երեկ տեղի ունեցածից, կարծում եմ, ողբերգություն չպետք է սարքել, բայց այն, ինչ սպասում էր հասարակությունը, չեղավ: Իսկ Րաֆֆին կատարեց այն, ինչ կարող էր և այն, ինչ պահանջեց ժողովուրդը: Չեմ կարող ասել, թե ամեն ինչ արվեց, ինչ հնարավոր էր, բայց Րաֆֆին արեց իր կարողությունների սահմանում ամեն ինչ: Իսկ հանդիպեցինք այն դիմադրությանը, ինչին սպասում էինք»,- նշեց Մանուել Գասպարյանը՝ հավելելով, որ Րաֆֆի Հովհաննիսյանն, իր վրա շատ մեծ պատասխանատվություն չվերցնելով, մասնակից դարձավ ժողովրդի շարժմանը և փորձեց ստեղծված իրավիճակից ելքի քայլ անել, նա սցենարը փոխեց, գնաց դեպի Բաղրամյան՝ ապացուցելով, որ «հիմա»-ն հնարավոր չէ:
Մ. Գասպարյանը նշեց, որ երեկ մի «երդում են տվել», որ չեն ճանաչում այս իշխանություններին, և պետք է փորձեն ստեղծված իրավիճակից դուրս գալու և ժողովրդի դժգոհությունը, անհնազանդությունը մեղմելու ելքեր գտնեն: Նրա համոզմամբ՝ Րաֆֆի Հովհաննիսյանի 18 կետանոց պահանջը պետք է մնա ուժի մեջ, և իշխանություններին ոչ մի զիջում պետք չէ անել:
Մ. Գասպարյանը հույս ունի, որ Րաֆֆի Հովհաննիսյանն ապրիլի 12-ին նոր ծրագրով պետք է գա հրապարակ և հետագա զարգացումները տեղում որոշի: Նա նշեց, որ այս պահին դժվարանում է խոսել քաղաքական հեռանկարների, հնարավոր զարգացումների և անհրաժեշտ քայլերի մասին:
Անդրադառնալով երեկ երեկոյան ՀՀ ոստիկանապետ Վլադիմիր Գասպարյանի ելույթին՝ մեր զրուցակիցն ասաց, որ նման հանցագործ ոստիկաններին շնորհակալություն պետք չէ հայտնել: «Ոստիկանապետն իր մեջ ուժ պետք է գտնի, որ հանցագործ ոստիկաններին, որոնք ծեծի ենթարկեցին Արմեն Մարտիրոսյանին, պատժի, ոչ թե նրանց շնորհակալություն հայտնելու առաջարկով հանդես գա: Երեկ ոստիկանության կողմից հանցագործություն կատարվեց»,- ասաց Մանուել Գասպարյանը:
Լուսանկարը՝ PanARMENIAN Photo-ի
