Մոնտենեգրոյի Կենտրոնական ընտրական հանձնաժողովը մտադիր չէ հրապարակել նախագահական ընտրությունների նախնական արդյունքներն այն բանից հետո, երբ երկու թեկնածուներն էլ հայտարարել են իրենց հաղթանակի մասին: Այս մասին հայտնում է Euronews-ը:
Տեղի ԶԼՄ-ները հաստատում են, որ սոցիոլոգիական ծառայությունները ընտրատեղամասերում exit poll չեն անցկացրել:
Գործող նախագահ Ֆիլիպ Վույանովիչն ու ընդդիմադիր գործիչ Միոդրագ Լեկիչը անցած գիշեր ձայների տոկոսների աննշան տարբերությամբ հայտարարել են նախագահի պաշտոնում ընտրվելու մասին:
Քվեարկությանն ընտրողների մասնակցությունը կազմել է 60 տոկոս:
Նշենք, որ ընտրություններին ֆավորիտ էր համարվում Վույանովիչը, որի նախընտրական ծրագրի հիմքում ժողովրդավարական բարեփոխումներն էին և ԵՄ-ին ու ՆԱՏՕ-ին ինտեգրումը: Նրա մրցակիցը խոստացել էր հաղթանակի դեպքում բարեփոխել իշխանական կառույցները և անցկացնել արտահերթ խորհրդարանական ընտրություններ:
