ՀՀ գյուղատնտեսության նախարար Սերգո Կարապետյանն հոկտեմբերի 6-ին այցելել է «Երևանի Արարատ կոնյակի-գինու-օղու կոմբինատ» ընկերության Մասիսի մթերման կայան, որտեղ հանդիպում է ունեցել ընկերության սեփականատեր Գագիկ Ծառուկյանի և խաղողագործների հետ։
Ինչպես տեղեկացրին ՀՀ գյուղատնտեսության նախարարության հասարակայնության հետ կապերի բաժնից, հանդիպման ընթացքում Գագիկ Ծառուկյանը նշել է, որ խաղողագործների հետ հանդիպման ժամանակ տրված խոստումը կիրականացվի։
«Երևանի Արարատ կոնյակի-գինու-օղու կոմբինատ» ընկերությունը իրականացնում է խաղողի մթերման աշխատանքներ Արմավիրի, Արարատի և Տավուշի մասնաճյուղերում։ Որպեսզի մեծ կուտակումներ չառաջանան գործարանների մոտ, Գագիկ Ծառուկյանն առաջարկել է խաղողագործներին 1-2 օր խաղողի բերքահավաք չիրականացնել, որպեսզի հնարավոր լինի մթերել արդեն իսկ քաղված խաղողի բերքը, քանի որ քաղված բերքն օրեցօր որակազրկվում է, և ընկերությունը չի կարող մթերել այդ խաղողը։
ՀՀ գյուղատնտեսության նախարար Սերգո Կարապետյանը նշել է, որ հոկտեմբերի 6-ին Արարատի և Արմավիրի մարզերում կայացած հանդիպումների ժամանակ ևս հորդորել է 1-2 օր խաղողի բերքահավաք չիրականացնել, որպեսզի բերքը չորակազրկվի և ընկերությունները կարողանան մթերել այն։
Գագիկ Ծառուկյանը միաժամանակ տեղեկացրել է, որ մթերման աշխատանքներն այսուհետև ևս կշարունակվեն։
