Ամեն տարի սեպտեմբերի 29-ին նշվում է Սրտի համաշխարհային օրը։ Այն առաջին անգամ նշվել է 1999 թվականին՝ Սրտի համաշխարհային ֆեդերացիայի նախաձեռնությամբ։
Այդ ակցիային իրենց աջակցությունն էին հայտնել ԱՀԿ-ն, ՅՈւՆԵՍԿՕ-ն և այլ նշանակալի կազմակերպություններ։ Սկզբում այն անցկացվել է սեպտեմբերի վերջին կիրակին, այնուհետև 2011-ից ունեցել ֆիքսված ամսաթիվ։ Նպատակը հանրության շրջանում սրտանոթային հիվանդությունների վտանգի մասին իրազեկվածության բարձրացումն է, ինչպես նաև բնակչության բոլոր խմբերում համապարփակ պրոֆիլակտիկ միջոցառումների նախաձեռնումը։
ԱՀԿ-ի հետ համագործակցությամբ ֆեդերացիան միջոցառումներ է անցկացնում ավելի քան 100 երկրներում։
Սրտի համաշխարհային ֆեդերացիայի տվյալներով՝ կաթվածներից վաղաժամ մահացության 80 տոկոս դեպքերը կարելի է կանխել առողջ ապրելակերպի, ծխախոտի օգտագործումը վերահսկելու, սնուցման և ֆիզիկական ակտիվության օգնությամբ։
