Պենտագոնը նվազեցնելու է տիեզերական ծրագրերի համար նախատեսված ծախսերը` դիմելով մասնավոր ընկերությունների ծառայություններին: Այս մասին հայտնել է պաշտպանության նախարարի գնումների, տեխնոլոգիաների և փոխադրումների գծով տեղակալ Էշթոն Քարթերը` ելույթ ունենալով վաշինգտոնյան Heritage հիմնադրամում:
Նա հիշեցրել է, որ նախագահ Օբաման բյուջեի հսկայական պակասորդը նվազեցնելու համար ապրիլի 13-ին պաշտպանության նախարարությանը հրահանգել է 10 տարվա ընթացքում ծախսերը նվազեցնել400 մլրդ դոլարով: Այս նախաձեռնությունն իրականացնելու նպատակով կկրճատվեն ռազմական հրթիռների գործարկման վրա ծախսվող միլիարդավոր դոլարները:
«Մեր տիեզերական ծրագրերը շատ թանկ են: Մենք մտադիր ենք մի քանի քայլ անել դրանք նվազեցնելու համար»,- նշել է նա: Այդպիսի քայլերից է մասնավոր ընկերությունների միջոցով, մեծածախ գներով, ռազմական հրթիռների դուրս բերումը դեպի տիեզերք: «Այդպիսի հեռանկարը հետագայում կարող է ազատել մեզ սեփական կրիչներն ունենալու պահանջից», – կարծում է փոխնախարարը:
2012 թ. ֆինանսական տարվա համար, որը սկսվում է 2011 թ. հոկտեմբերի 1-ին, Պենտագոնը 1,76 մլրդ դոլար արժողությամբ 4-5 կրիչների պատվեր է ներկայացրել: Սա նախատեսված է առաջիկա 5 տարիների համար, այնինչ նախկինում ծրագրվել էր հատկացնել 10 մլրդ դոլար:
Անցյալ ամիս ամերիկյան 7 ընկերություններ, որոնք արտադրում են հրթիռներ և արբանյակներ, հայտարարել են միություն ստեղծելու մասին, որը նպատակ ունի կառավարության պատվերով իրականացնել մասնավոր կրիչների թողարկում: