Minval.az-ի փոխանցմամբ՝ Ադրբեջանի նախագահ Իլհամ Ալիևը սեպտեմբերի 23-ին մեկնելու է Մոսկվա։ Այդ մասին տեղեկատվությունը նախորդ շաբաթ տարածել են ռուսական ԶԼՄ-ները։ Այդ օրը, որը նախորդում է Ղուրբան բայրամ տոնին, Ալիևը մասնակցելու է Մոսկվայի կենտրոնական մզկիթի բացման արարողակարգին։
Ռուսաստանի Մուֆթիների խորհրդի նախագահ, շեյխ Ռավիլ Գայնուտդինը ԶԼՄ-ներին հայտնել է, որ մզկիթի բացման արարողակարգին մասնակցելու են Ռուսաստանի նախագահ Վլադիմիր Պուտինը, կրոնական գործիչներ, ինչպես նաև Պաղեստինի, Հորդանանի, Կատարի, Քուվեյթի, Սաուդյան Արաբիայի, Թուրքիայի, Իրանի, Թուրքմենստանի, Ղրղըզստանի, Տաջիկստանի, Ուզբեկստանի, Ադրբեջանի ղեկավարները։
Թուրքիայի նախագահ Ռեջեփ Էրդողանը հաստատել է իր այցը Մոսկվա։ Ռուսաստանի նախագահի մամլո քարտուղար Դմիտրի Պեսկովը հայտարարել է, որ Վլադիմիր Պուտինը սեպտեմբերի 23-ին հանդիպում է ունենալու Էրդողանի հետ։ Ադրբեջանական լրատվամիջոցը ուշադրություն է հրավիրում, որ սեպտեմբերի 23-ին Մոսկվայում են լինելու Ռուսաստանի, Թուրքիայի ու Ադրբեջանի նախագահները, և որ դա նոր հնարավորություն է համաձայնեցնելու համար մի շարք հարցեր։
Պուտինը, Էրդողանն ու Ալիևը երկկողմ ու եռակողմ ձևաչափով վերջին անգամ հանդիպել են այս տարվա ամռանը՝ Բաքվում Եվրոպական առաջին խաղերի բացման շրջանակներում։
