Բրազիլիայի ընդդիմադիր քաղաքական կուսակցությունները հինգշաբթի կոնգրեսին են ներկայացրել նախագահ Դիլմա Ռուսեֆի հրաժարականի և նրա նկատմամբ հետաքննություն անցկացնելու պահանջ՝ հարկային օրենսդրության խախտումներին մասնակցելու և անցած տարի իր վերընտրության ֆինանսավորման համար պետական միջոցները օգտագործելու կասկածանքով: Այս մասին հայտնում է մեքսիկական El Economista պորտալը:
Հաղորդվում է, որ երկրի ղեկավարը հրամանագիր է ստորագրել, որը թույլ է տվել 2014թ. ավելացնել պետական բյուջեի ծախսերը, ինչը նախորդել է հոկտեմբերին նախագահական ընտրությունների անցկացմանը:
«Մենք կռվում էինք հրացաններով զինված դիկտատուրայի դեմ, իսկ հիմա հանդես ենք գալիս կաշառքների դիկտատուրայի դեմ, որը շատ ավելի վատն է հրացանների դիկտատուրայից»,- մեջբերում է La Jornada պորտալը միջնորդագրի նախաձեռնողներից մեկի՝ արդարադատության նախկին նախարար Միգել Ռեալե Ժունիորի խոսքերը: Նրա խոսքերը վերաբերում են 1964-1985 թվականներին, երբ Բրազիլիայում կառավարել է ռազմական խունտան:
Այժմ խոսքը կոնգրեսի ղեկավար Էդուարդ Կունյայինն է, որը պետք է որոշի՝ արդյոք հետագա ընթացք տա՞լ միջնորդագրին, թե՞ ոչ: Առայժմ Կունյան հրաժարվում է հայտնել, թե երբ կհրապարակի իր որոշումը:
