Իրանական Mehr լրատվական գործակալության փոխանցմամբ՝ Իրանի նախագահ Հասան Ռուհանին, ելույթ ունենալով Իսլամական հեղափոխության պահակազորի 21-րդ գլխավոր վեհաժողովում, հայտարարել է, որ Իրանը ձգտում է հետպատժամիջոցային ժամանակաշրջանում ընդլայնել միջազգային համագործակցությունը։
Նրա խոսքով՝ Իրանը տնտեսական հարաբերությունների վերականգնման հարցը քննարկել է Արևմուտքի երկրների ներկայացուցիչների հետ, որոնք Թեհրան են այցելել այս տարվա հուլիսի 14-ին Իրանի ու «վեցյակի» միջև միջուկային համաձայնագրի ձեռքբերումից հետո։ Ռուհանին վստահեցրել է, որ այդ գործարքն Իրանին հնարավորություն է տալիս իր միջուկային խաղաղ ծրագրի շրջանակներում զբաղվել հետազոտություններով ու մշակումներով։
Ռուհանին ընդգծել է, որ Իսլամական հեղափոխության պահակազորն ու մյուս զորատեսակներն իրենց ուրույն ներդրումն են ունեցել իսլամական հեղափոխության պաշտպանության ու նրա ձեռքբերումների, ինչպես նաև Իրանի Իսլամական Հանրապետության անկախության ու տարածքային ամբողջականության պահպանության հարցերում, և այդ պլանում մեջբերել է Իսլամական հեղափոխության առաջնորդ, իմամ Խոմեյնիի կարգախոսը. «Անկախություն, Ազատություն և Իսլամական Հանրապետություն»։
Խոսելով Եմենում, Իրաքում, Սիրիայում, Լիբանանում, Բահրեյնում, Աֆղանստանում, Պակիստանում, ինչպես նաև Հյուսիսային Աֆրիկայի մուսուլմանների ունեցած խնդիրների մասին՝ Ռուհանին հայտարարել է, որ այդ բոլոր երկրներում ահաբեկիչների ակտիվությունը բխում է իրենց թշնամիների շահերից, որոնք ցանկանում են վնաս պատճառել շիաներին։
