Աջարիայի Ինքնավար Հանրապետությունում փոթորկի հասցրած վնասը, նախնական տվյալներով, կազմում է 2 մլն լարի (շուրջ 1.2 մլն դոլար): Այս մասին հայտնում է newsgeorgia.ru-ն:
Ուժգին քամին Վրաստանն իր իշխանության տակ է առել կիրակի և զգալիորեն վնասել տարածաշրջանը՝ ինչպես երկրի արևմուտքում, այնպես էլ արևելքում: Աջարիայում մի ձկնորս է անհետ կորել, որի որոնումները շարունակվում են:
Վարչապետ Բիձինա Իվանիշվիլիի հանձնարարականով Աջարիայում ստեղծվել է փոթորկի հետևանքների վերացման Արտակարգ շտաբ, որը գլխավորել է Աջարիայի կառավարության ղեկավար Արչիլ Խաբաձեն:
Աջարիայի կառավարությունում գործում է 24-ժամյա թեժ գիծ, որով բնակչությունը կարող է տեղի իշխանություններին իրազեկել աղետի պատճառած վնասի մասին: Տուժածները կարող են օգտվել նաև ԱԻՆ թեժ գծից՝ 112:
Էլեկտրալարերի վնասման պատճառով շուրջ 50 հազար բաժանորդ Վրաստանում մնում է առանց էլեկտրաէներգիայի:
Քոբուլեթ առողջարանային քաղաքում (Աջարիա) քամին պոկել է 47 տների տանիքներ, Խելվաչաուր շրջանում փոթորկից վնասվել է 93, Գորիում՝ 80 տուն: Թբիլիսիում քամին 50 տան տանիք է պոկել:
