Մաքսային միությանը Հայաստանի անդամակցության հարցը շահարկում են Հայաստանն ու Եվրոպան: ՀՀ իշխանություններն են արհեստականորեն Հայաստանի արտաքին կողմնորոշման խնդիրը դնում՝ դրանով որոշակի քաղաքական խնդիրներ լուծելու նպատակով: Այս կարծիքին է ՌԱՀՀԿ ղեկավար, քաղաքական փորձագետ Մանվել Սարգսյանը: «Առաջին լրատվական»-ի հետ զրույցում նա ասաց, թե իր համար անհասկանալի է այս հարցի շահարկումը, քանի որ, իր համոզմամբ, այդպիսի երկընտրանք դրված չէ Հայաստանի առջև:
«Իրենք միշտ էլ հայտարարել են, որ ոչ մեկին էլ չեն սպասում: Եթե չեն սպասում, Հայաստանում ինչո՞ւ է այդքան շատ քննարկումների առարկա դառնում այս խնդիրը: Թե ինչու՝ դժվար է ասել: Կարող ենք շատ հարցերի պատասխանել, եթե հստակ լինի՝ Մաքսային միությունը ՌԴ-ի համար էակա՞ն հարց է, կոնկրետ ինտեգրացիոն պրոյե՞կտ է, թե՞ ոչ: Հնարավոր է ՌԴ-ի համար դա գեոպոլիտիկ նշանակություն ունեցող հարց է, որի միջոցով փորձում են հարաբերություններ հստակեցնել իրենց հարևան պետությունների հետ և տարածաշրջանում ընդհանրապես: Իմ կարծիքով՝ սա ավելի շատ քաղաքական խնդիր է, քան կոնկրետ ինտեգրացիոն պրոցես»,- ասաց Մանվել Սարգսյանը՝ հավելելով, որ ԵՄ ծրագրերը կոնկրետ նպատակ ունեցող ծրագրեր են, ինչը հնարավոր չէ ասել ՌԴ-ի կողմից առաջարկվող ֆորմատի մասին: Ուստի, ըստ նրա, քանի դեռ պարզ չէ, թե ինչ ծրագիր է Մաքսային միությունը և ինչ նպատակով է ձևավորվել, ինչ նշանակություն ունի ՌԴ-ի համար, հնարավոր չէ ենթադրել, թե արդյո՞ք ՌԴ-ն կփորձի ճնշել Հայաստանին:
Մանվել Սարգսյանը նաև չի կարծում, որ օրեր առաջ ՀՀ նախագահ Սերժ Սարգսյանի դիտարկումը, թե ՀՀ-ին Մաքսային միությունում չեն սպասում, հստակ «ոչ» էր՝ ուղղված ՌԴ-ին:
