Թուրքական Anadolu լրատվական գործակալության փոխանցմամբ՝ «Քրդստանի աշխատավորական» կուսակցության (PKK) զինյալները վերջին երկու տարում առևանգել են 316 անչափահասի, որոնցից 88-ն աղջիկներ են։ Այդ մասին հայտնել է թուրքական ոստիկանությունը՝ վկայակոչելով ծնողներից ստացված հաղորդումները։
Մասնավորապես, 2013 թվականի օգոստոսի 22-ից մինչև դեկտեմբերի 31-ն ընկած ժամանակահատվածում PKK-ի զինյալներն առևանգել և իրենց հետ լեռներն են բարձրացրել 37 անչափահասի, որոնցից 26-ը տղաներ են, իսկ 11-ը՝ աղջիկներ։ 2014 թվականին գրանցվել է երեխաների առևանգման 205 դեպք (151 տղա և 54 աղջիկ)։
Իսկ այս տարի (մինչև օգոստոսի 22-ը) PKK-ն առևանգել ու լեռներ է տարել 74 երեխայի, որոնց թվում 51-ը տղաներ են, իսկ 23-ը՝ աղջիկներ։ Այդպիսով, 2013 թվականի օգոստոսի 22-ից մինչև 2015 թվականի օգոստոսի 22-ն ընկած ժամանակահատվածում PKK-ն առևանգել է 18-ից ցածր տարիք ունեցող 316 երեխայի, որոնիցից 228-ը տղաներ են, իսկ 88-ը՝ աղջիկներ։
Դրա հետ մեկտեղ հաղորդվում է, որ 2014 թվականին PKK-ն ընդհանուր առմամբ առևանգել է 1000 մարդու (բոլոր տարիքային կատեգորիաների ներկայացուցիչներ), իսկ այս տարվա օգոստոսի 22-ի դրությամբ՝ 350 մարդու։
