Հոգեբան Միհրդատ Մադաթյանի մեկնաբանությամբ՝ գարնանը տեղի է ունենում էմոցիոնալ սրացում, որի հաշվին մարդկանց մոտ սրվում է նաև դեպրեսիան: «Առաջին լրատվական»-ի հետ զրույցում նա ասաց, որ դեպրեսիայից խուսափելու համար անհրաժեշտ է լինել լավատես, գտնվել հաճելի միջավայրում, նախագծել նոր պլաններ. «Կանայք հաճախ գնումների միջոցով են դա անում, իսկ տղամարդիկ ավելի հաճախ են հավաքվում ընկերական շրջապատում»:
Նա նկատեց, որ դեպրեսիան բնորոշ է բոլոր երկրներին, և պարտադիր չէ այն կապել սոցիալական վատ վիճակի հետ. «Շվեդիան և Նորվեգիան սոցիալապես ապահով երկրներ են, բայց ամենամեծ դեպրեսիոն ցուցանիշներն արձանագրվում են հենց այստեղ: Մենք արտառոց տեղ չենք զբաղեցնում դեպրեսիոն երկրների ցուցակում, եթե հաշվի առնենք, որ դեպրեսիան այսօր համարվում է համար մեկ հիվանդությունը»:
Հոգեբանը հավելեց նաև, որ հաճախ մարդու մոտ կարող է առաջանալ դեպրեսիա առանց պատճառի: Դա կոչվում է նաև էնդոգեն դեպրեսիա և բնորոշ է հատկապես հոռետես մարդկանց, երբ ամեն ինչից դժգոհ են և չեն ուրախանում փոքր հաջողություններով:
