Ղազախստանի ընդդիմությունը նախաձեռնում է հանրաքվե՝ Ռուսաստանի ու Բելառուսի հետ Մաքսային միությունից երկրի դուրս գալու հարցի շուրջ: Հանրաքվեի անցկացման համար անհրաժեշտ է 200 հազար քաղաքացու ստորագրություն: Ընդդիմությունն ակնկալում է ստանալ այդքան ստորագրություն, քանի որ բնակչության մոտ 2/3-ը հիասթափված է փոփոխություններից, որոնք տեղի են ունեցել Ղազախստանում Մաքսային միությունում ընդգրկվելուց հետո:
Որոշ փորձագետներ հաստատում են, որ ընդդիմության գործողությունները արտոնված են իշխանության կողմից, որն այդ կերպ ազդանշան է ուղարկում Կրեմլին: Այս մասին գրում է «Նեզավիսիմայա Գազետան»:
«Ազատ» կուսակցության առաջնորդ Բուաթ Աբիլովը հայտնել է, որ ընդդիմությունը դեմ չէ Մաքսային միությանն ինքնին, այլ դեմ է Ռուսաստանի կողմից Ղազախստանի տնտեսության կլանմանը: Նա Մաքսային միությունում Ղազախստանի գտնվելը համարում է տնտեսապես ոչ նպատակահարմար: Վերջին երկու տարվա ինտեգրացիոն աշխատանքում հանրապետությունում 10-15 տոկոսով աճել են վառելիքի, առաջին անհրաժեշտության և ծառայությունների գները: Ներքին շուկան հեղեղված է ռուսական և բելառուսական ապրանքներով, որոնք դուրս են մղել տեղականը:
Դեռևս բողոքի զանգվածային ակցիաներ տեղի չեն ունենում, սակայն ժողովրդի դժգոհությունն աճում է: Համաձայն սոցհարցումների՝ 70 տոկոսը կողմ է Մաքսային միությունից երկրի դուրս գալուն:
