Ամերիկացի գրող Ջորջ Մարտինը պատմել է իր «Սառույցի և կրակի երգ» ցիկլի հնարավոր ավարտի մասին, որը դրվել է «Գահերի խաղը» սերիալի հիմքում: Observer պարբերականին տված հարցազրույցում նա ասել է, որ պատմության ավարտը կլինի «դառը-քաղցր»:
Մարտինը նշել է, որ դեռ չի ավարտել ցիկլը և դրա ավարտի մասին ինչ-որ կոնկրետ բան ասել չի կարող: «Ես երբեք չեմ թաքցրել, որ ինձ ոգեշնչում է Տոլկինը, և ինձ շատ է դուր գալիս՝ ինչով ավարտվեց «Մատանիների տիրակալը»: Դա հաղթանակ է, բայց հաղթանակը դառն է: Ֆրոդոն երբեք նախկինը չի դառնա և ստիպված է Վալինոր ՝ անմահների երկիր գնալ, իսկ մյուս մարդիկ շարունակում են ապրել: Մոտավորապես դրան ես կձգտեմ»,- ասել է գրողը:
Հիմա Մարտինն ավարտում է ցիկլի վեցերորդ վեպի աշխատանքները: «Ձմռան քամիները» հավանաբար վաճառքի կհանվի 2016թ. ապրիլին:
