Անցած շաբաթ ՀՀ արտարժութային շուկայում ԱՄՆ դոլարի թռիչքից հետո (0.94%) այս շաբաթվա ընթացքում սպասվում է որոշակի կայունացում, գուցե նաև փոխարժեքի նվազում: Ինչպես «Առաջին լրատվական»-ին հայտնեց FOREX Club-ի վերլուծաբան Միքայել Վերդյանը, ամերիկյան արժույթը չի կարողանա հաղթահարել 415 դրամի շեմը: Դրան, իհարկե, կնպաստի նաև Կենտրոնական բանկը՝ արժութային շուկայում իր ներարկումներով:
Սակայն հաշվի առնելով միջազգային շուկայում ԱՄՆ դոլարի դրական վարքագիծը իր հիմնական մրցակիցների նկատմամբ՝ կարելի է ենթադրել, որ դոլարի կորուստները այնքան էլ զգալի չեն լինի:
Ըստ վերլուծաբանի՝ Կիպրոսի օգնության նոր՝ վիճելի ծրագիրը, որով նախատեսվում է միանվագ հարկել բանկային դեպոզիտները, նույնպես կարող է հանգեցնել միջազգային շուկայում դոլարի պահանջարկի զգալի ավելացման՝ որպես պահուստային ակտիվի:
Միաժամանակ ՀՀ-ում բնակչության և գործարարների կողմից պահպանվում է դոլարի նկատմամբ բարձր պահանջարկը. միջբանկային արժութային շուկայում անցած շաբաթ վաճառվել է 19.06 մլն դոլար, որը նախորդ շաբաթվա համեմատ ավելի է 4.88%-ով:
«Մեր գնահատականներով՝ առաջիկա շաբաթվա ընթացքում ՀՀ-ում կանխիկ դոլարի միջին փոխարժեքը, հավանաբար, կտատանվի 412-417 դրամի միջակայքում»,- ասաց Մ. Վերդյանը:
Երկարաժամկետ կտրվածքով, ըստ նրա, դոլարը կշարունակի սահուն աճը և տարվա վերջին կգտնվի 420-425 դրամ միջակայքում. «Սա դրամի սահուն արժեզրկման քաղաքականության շրջանակներում է»: Վերլուծաբանի կարծիքով՝ դոլարի փոխարժեքի տատանումների որոշակի ակտիվացում հավանաբար կլինի մայիս-հունիսին, որից հետո բիզնեսի ակտիվությունը կմարի՝ պայմանավորված արձակուրդներով, իսկ սեպտեմբեր-հոկտեմբերին դրամի սահուն արժեզրկումը կրկին կսկսվի ու կշարունակվի մինչև դեկտեմբեր:
