Ուկրաինան կդառնա Մաքսային միության ասոցացված անդամ։ Համապատասխան պայմանավորվածությունը ձեռք է բերվել ՌԴ-ի և Ուկրաինայի աշխատանքային խմբերի մակարդակով։ Հինգշաբթի օրն այս մասին գրում է Зеркало недели. Украина հրատարակչությունը՝ հղում կատարելով իր աղբյուրին:
Ռուսաստանն Ուկրաինային առաջարկում է ընդգրկվել Մաքսային միությունում, որի արդյունքում հնարավոր է գազի գնի իջեցում: Կիևը հայտարարել է, որ ծրագրում է աստիճանաբար միանալ ՄՄ որոշ կանոններին և կարող է միության հետ համագործակցել դիտորդի կարգավիճակով, սակայն դեռ պատրաստ չէ դառնալ այդ համակարգի անդամը:
Հրատարակչության տվյալներով՝ մարտի 4-ին Ուկրաինայի և ՌԴ-ի նախագահների հանդիպումից հետո պետությունների կառավարությունները ստացել են են Կիևի և ՄՄ-ի համագործակցության բանաձևը գտնելու առաջադրանք, որը ընդունելի կլինի երկու կողմերի համար էլ:
Այս շաբաթ Մոսկվա է ժամանել ուկրաինական պատվիրակությունը, և ռուսական կողմի հետ բանակցությունների արդյունքում պայմանավորվածություն է ձեռք բերվել, որ Ուկրաինան ՄՄ մուտք կգործի որպես ասոցացված անդամ:
Ենթադրվում է, որ այս ձևաչափը թույլ կտա Ուկրաինային ուսումնասիրել ՄՄ բոլոր փաստաթղթերը, ինչպես նաև այդ կառույցի որոշումներ կայացնելու գործընթացը և ձայնի իրավունք չունեցող դիտորդի կարգավիճակով երկրի մասնակցության պրակտիկան։
