Ռուսական TASS լրատվական գործակալության փոխանցմամբ՝ Մոսկվայի կողմից С-300 զենիթահրթիռային համալիրների (ԶՀՀ) փոխանցումը Թեհրանին չի վերացնում Իրանի միջուկային օբյեկտների դեմ ԱՄՆ-ի կողմից ռազմական գործողություն անցկացնելու հնարավորությունը, սակայն զգալիորեն բարդացնում է այն։ Այս մասին հայտարարել է ԱՄՆ զինված ուժերի շտաբների պետերի կոմիտեի նախագահ, գեներալ Մարտին Դեմփսին։
Նա ելույթ է ունեցել ԱՄՆ կոնգրեսի սենատի՝ զինված ուժերի հարցերով հանձնաժողովում, որտեղ լսումներ են կազմակերպվել Իրանի միջուկային խնդրի կարգավորման շուրջ ձեռք բերված համաձայնագրի վերաբերյալ։
Դեմփսիից բացի, այդ լսումներին մասնակցել են նաև ԱՄՆ պետքարտուղար Ջոն Քերին, Պենտագոնի ղեկավար Էշթոն Քարթերը, ֆինանսների նախարար Ջեյկոբ Լյուն և էներգետիկայի նախարար Էռնեստ Մոնիսը։
Սենատոր Մայք Լին (հանրապետական, Յուտա նահանգ) Դեմփսիից հետաքրքրվել է, թե Իրանի դեմ ԱՄՆ-ի հնարավոր ռազմական գործողության վրա ի՞նչ ազդեցություն կունենա Ռուսաստանի կողմից Իրանին С-300 ԶՀՀ-ներ մատակարարելը, այդ թվում նաև՝ հետախուզական թռիչքների պլանում։ Ի պատասխան՝ Դեմփսին ասել է՝ անկասկած, դա ավելի կբարդացներ, սակայն անհնար չէր դարձնի Իրանի դեմ ԱՄՆ-ի հնարավոր ռազմական գործողությունը։
Պետքարտուղար Ջոն Քերին իր հերթին հայտարարել է, որ Ռուսաստանի կողմից Իրանին С-300 ԶՀՀ-ներ մատակարարելն արգելված չէ Թեհրանին զենք մատակարարելու վրա դրված միջազգային էմբարգոյով, քանի որ դրանք չեն ընկնում ՄԱԿ ԱԽ-ի համապատասխան որոշումների տակ։
